Ginkumbinar nga operasyon nga haras, demolisyon ngan pagsirot an iginpatuman han Bagong Hukbong Bayan (BHB)-Masbate (Jose Rapsing Command) ha sakob han siyam kaadlaw agud atakihon an gintig-ob nga pwersa han militar, pulis ngan mga CAFGU.

Hadton Marso 24, ginpabuthan han mga Pula nga mangaraway an detatsment han CAFGU ha Barangay Manlut-od, Placer. Duha an namatay ngan duha an samaran ha mga pasista.

Hadton Marso 22, usa nga operasyon nga haras an iginlansar han Pula nga hukbo ha usa ha mga hedkwarters han militar ha Barangay Estampar, Cataingan. Ginpabuthan liwat han mga Pula nga mangaraway an panmilitar nga tropa nga naka-istasyon ha Barangay San Vicente, Dimasalang hadton Marso 15.

Hadton Marso 17, ginparalisa han BHB-Masbate an usa nga mixer truck ha Barangay Santa Cruz, Placer nga pananag-iya han usa nga kompaniya ha konstruksyon tungod ha pagtalapas ha pagsurundon han rebolusyunaryo nga kagiusan.

Ha Bukidnon, ginpatukan hin sangsyon han BHB an usa nga negosyante nga parupanlupot han tuna ha Barangay Siloo, Malitbog hadton Abril 5. Ginsunog han Pula nga Hukbo an usa nga bilding ngan makina nga gin-gagamit ha pagproseso han bilanghoy nga gintatantiya nga ₱3 kamilyon. Nakumpiska liwat han hukbo an usa nga pusil ngan duha nga radyo.

Aktibo nga depensa. Ha Camarines Sur, duha kabeses nga nakagdepensa an BHB-West Camarines Sur (Norben Gruta Command) ha pag-atake han mga sundalo han 81st IB ngan 16th IB hadton Pebrero 23-24 ha bungto han Ragay. Diri mamenos ha 11 nga sundalo an namatay ngan pito an nasamaran. Namatay an Pula nga mangaraway nga hi Angelo “Ka Kim” San Diego.

Ha Negros Occidental, nakagdepensa liwat an yunit han BHB-Northern Negros (Roselyn Jean Pelle Command) kontra ha pag-atake han 79th IB hadton Marso 18 ha Barangay General Luna, Toboso. Tulo nga sundalo an iginreport han 79th IB nga nasamaran ha agway kundi gintatantiya nga mas damo pa an nahibang.