Sinabat ti protesta dagiti progresibo a grupo ti panagbisita iti Pilipinas ti baro a sekretaryo iti depensa ti US a ni Peter Hegseth idi Marso 28. Adda ditoy pagilyan ni Hegseth agingga Marso 29, tapno mitingen dagiti upisyal iti depensa ken militar ti Pilipinas tapno iduron ti managgubat nga adyenda ti US iti Pilipinas ken iti Asia.

Maysa kadagiti adyenda ni Hegseth ti panangigabsuon kadagiti ramit-militar ti US iti pagilyan, umannurot iti estratehiko a panggep daytoy a kubkoben ti China babaen ti first-island chain. Kalpasan nga ipwesto ti Typhon Missile System iti amianan a Pilipinas, plano met ti US nga ipwesto iti pagilyan ti NMESIS (Navy Marine Expeditionary Ship Interdiction System).

Ti NMESIS ket maysa a sistema ti misayl nga anti-ship wenno pangpabettak ti barko. Nakakarga daytoy iti maysa nga unmanned ground vehicle (dakkel a trak) a maaw-awagan a ROGUE Fires Carrier ken addaan karga a Naval Strike Missile (NSM). Dagiti NSM ket dagiti misayl a mabalin nga agtayab nga agingga 185 kilometro nga “stealth feature” tapno saan a malasin daytoy. Daytoy a sistema ket ar-aramaten ti US Marine Corps para kadagiti adayo nga atake laban kadagiti barko manipud iti daga.

Kagiddan ti NMESIS, agideploy ti US kadagiti unmanned surface vessel nga aramaten ti US iti South China Sea. Dagitoy a “drone” a pangbaybay ket kadawyan a babassit ken nalag-an ken nakadisenyo para iti nadawel a panawen iti kabaybayan ken naiilet a pagayusan ti danum. Dagitoy ket kargado kadagiti sensor, kamera, sistema nga ISR ken sonar wenno sistema a mangduktal kadagiti banag iti uneg ti danum. Mabalin daytoy a direkta wenno saan a direkta a kontrolen ti tao. Maar-aramat daytoy para iti panagtiktik, sarbeylans, rekorida ken panangiwanwan ti trapiko iti baybay.

Dagitoy a ramit ket tenglen ti binukel a Littoral Rotational Force-Luzon ti 3rd Marine Littoral Regiment ti US. Kas kadagiti immuna a “rotational force,” agbalin a permanente ti presensya daytoy iti kabaybayan ken kostal ti Pilipinas, kaniwas iti reaksyunaryo a konstitusyon a mangiparparit iti presensya dagiti gangannaet a tropa. “Maiyam-ammo” daytoy a permanente a pwersa iti umay a Balikatan 2025, nu sadinno a mangidaulo daytoy iti maaramid a “full battle test” nu sadinno nga aramaten ti US ti Pilipinas a pangisayangkatan ti gubat na laban iti China.