Dinukot ken inlugan iti van dagiti kameng ti 96th Military Intelligence Company (MICO) ti 9th ID ti maysa a residente ken mannalon iti Barangay Cabangcalan, Placer, Masbate idi Marso 29, alas-6 ti bigat. Nabigbig ti biktima a ni Junior Tuling, 56 anyos.

Siguden a biktima ti inkapilitan a “panagpasuko” ti militar ni Tuling. Idi 2021, inkapilitan isuna a “pinasuko” dagiti soldado iti kangitingitan ti panangisayangkat da ti Retooled Community Support Program (RCSP). Idiay Masbate, adun ti kapada ni Tuling a “simmuko” ken kalpasan a nagkedked nga agpaaramat iti militar kas ahente iti paniktik wenno ag-CAFGU ket liplipiten dagiti soldado.

Nagpanawagan ti tulong ti pamilya ken kakabagyan ni Tuling tapno ammuen ti ayan na. Kiddaw da a mapagsungbat dagiti berdugo a militar ken maikkan hustisya ti biktima. Nagpanawagan da kadagiti upisyal ti barangay nga umaksyon ken agaramid kadagiti addang tapno tuntunen ti biktima ken siguraduen ti kinatalged na.

Iti maysa a naisina nga insidente idi Marso 27, binugbog dagiti tauhan ti 96th MICO ni Totong Cuyos, mannalon ken residente iti Barangay Cabrera, Dimasalang. Malaksid ditoy, naiyulat iti maikadwa a distrito ti Masbate ti nasaknap a panagtakaw ti militar kadagiti sibilyan a parparwaren da nga aramid ti New People’s Army.

Panag-aresto. Idiay Quezon, inaresto ti 85th IB ken dagiti pulis dagiti sibilyan a da Darwin Palo ken Jay-Ar Molantes iti Lucena Grand Terminal, Lucena City idi Marso 27. Dagiti biktima ket mapan koma idiay Bulacan tapno agtrabaho.

Ni Palo, mannalon manipud iti ili ti Lopez, Quezon ket binansagan dagiti pulis a maysa kadagiti “most wanted” a kriminal iti rehiyon ti Calabarzon. Segun kadakuada, ni Palo ket sumangsango iti innem nga agtutuon a kaso kabilang ti adu a gandat a panagpatay ken panaglabsing iti Anti-Terrorism Act of 2020. Ak-akusaran da met isuna a kolektor ti NPA-Quezon para iti kunkunada a “permit-to-campaign” tatta eleksyon 2025. Kabayatanna, saan nga inyulat dagiti pulis ti pannakakemmeg ni Molantes.

Peke a panagpasuko. Balbaliw a pinarwar dagiti pulis ti Cebu a “simmuko” kadakuada ti maysa a 25-anyos a lalaki a mannalon a residente ti Barangay Bonbon, Aloguinsan, Cebu idi Marso 28. Parparwaren dagiti pulis nga isuna ket “tagasuporta ti NPA.” Segun kadagiti residente ti Barangay Bonbon, nu sadinno nga adda ti laban ti daga ti San Roque Farmers Association, siguden a naparwar a “simmuko” ti nasao a mannalon.

Kabayatan na, napan dagiti soldado iti sidong ti 31st Civil Military Operations (CMO) iti balay ti pangulo ti San Roque Farmers Association (SRFA) iti Barangay Bonbon idi Marso 11. Hinaras ken riniribuk ti pito a soldado ni Pio Del Rosario tapno pawilan isuna iti panangkundenar ken panangibunannag iti militarisasyon ken panangidadanes iti komunidad da.