Saan a naragsakan ti liderato ti Moro Islamic Liberation Front (MILF) iti panangdutok ni Ferdinand Marcos Jr ken Abdulraof Macacua kas baro a temporaryo a dadaulo a ministro ti Bangsamoro Transition Authority (BTA). Segun iti pablaak nga inruar ti Komite Sentral daytoy, awan ti inaramid ni Marcos a konsultasyon ken kaniwas daytoy iti rekomendasyon a pagtalinaeden ti agdama a dadaulo a ministro a ni Ahod Ebrahim (Al Haj Murad). As-asideg iti rehimen Marcos ni Macacua, a maysa met a lider ti MILF.

Iti mandar ni Marcos, ni Murad ket nadutokan a maysa laengen iti 80 a pangrehiyon a representante, banag a saan na nga inaklon. Nadutokan ni Murad iti BTA idi 2019 iti dati a presidente Rodrigo Duterte. Isuna ti agdama a pangulo ti MILF ken commander-in-chief ti Bangsamoro Islamic Armed Forces, ti armado a pwersa ti MILF.

Salungasing iti pinal a katulagan iti kapya a naipasa kas linteg a Bangsamoro Organic Law (BOL) ti agdadata a pannakibiang ti rehimen Marcos iti internal a proseso ti MILF. Rabrabngisen daytoy dagiti probisyon nu sadinno a nakalanad ti “prinsipyo ti awtonomiya” ti grupo. Daytoy a linteg ket naipasa iti panawen pay ti rehimen Aquino, ngem agingga ita ket saan pay a naan-anay a naipatungpal gapu ta saan pay a naisaysayangkat ti umuna nga eleksyon para iti panangbukel ti awtonomiya a gubyerno ti Bangsamoro.

Labsing met iti BOL ti panangidutok ni Marcos iti 34 laeng iti 41 a tauhan ti MILF iti BTA. Nakalanad iti BOL a ti BTA ket idauluan kangrunaan ti MILF, sekundaryo dagiti pwersa ti Moro National Liberation Front ken adayo a maikatlo ti saan a Moro a katutubo nga umili. Napukaw ti mayorya a pusisyon ti MILF idi sukatan ni Marcos ti 70 tauhan daytoy idi Marso 3.

Iti pannakibiang ti rehimen iti BTA, pakpakapsuten ni Marcos ti kredibilidad ti liderato ti MILF. Iti panagtallikod ken saan a panangikaskaso daytoy kadagiti rekomendasyon ti MILF, epektibo nga inikkatan ni Marcos ti karbengan ti MILF nga idauluan ti BTA nga ita ket mangiwarwardas iti BARMM. Daddadaelen met daytoy ti talek ti umili a Moro iti proseso ti kapya.

Iti saan a panangikaskaso ti Gubyerno ti Pilipinas kadagiti probisyon ti BOL, ipakpakita daytoy ti kinagulib ti GRP, ken partikular ti rehimen Marcos kadagiti serserken daytoy a katulagan iti saritaan iti kapya.