Labi nga ginapainit subong sang imperyalismong US ang banggaan imperyalista sa bug-os nga kalibutan. Gindeklarar sini lang sang imperyalistang gobyerno sang US ang ginatawag sini nga “deterrence strategy” ukon “estratehiya sang pagpugong” batuk sa “agresyon sang China” sa South China Sea, para kuno “agumon ang kalinong paagi sa kusog” kag “likawan ang gyera.”

Ang deklarasyon ginhimo ni Defense Sec. Pete Hegseth sang US sang nagbisita sa Pilipinas sadtong ulihi nga semana sang Marso. Indi mapunggan ang pag iwol-iwol sang ikog ni Marcos kag mga ido-ido sang Amerikano nga upisyal sa pagpanguna ni Defense Sec. Gilbert Teodoro, nga nagtanyag sa US nga gamiton ang pungsod para sa estratehiya sini. Ini pagkatapos sila pangakuan nga ipadayon ang plano nga paghatag sang $500 milyon nga ayuda militar.

Pagkatapos sang pila ka adlaw, sa mando sang US, gin-anunsyo ni Gen. Romeo Brawner, hepe sang Armed Forces of the Philippines (AFP), nga pasangkaron ang sakup sang operasyon sang AFP lapaw pa sa pinakapunta nga isla sang Mavulis sa Batanes. Ginmanduan niya ang Northern Luzon Command nga maghanda kon “may pagsalakay sa Taiwan.” Ang matuod, luyag sang US nga ipwesto didto ang mas madamo nga soldado nga Pilipino agud magserbe nga taga-alalay sa mga tropa nga Amerikano nga plano nga ipwesto malapit sa Taiwan.

Dapat pursigido nga isikway kag pakigbatuan sang pumuluyong Pilipino ang pagpagamit sang rehimen Marcos sa estratehiya sang imperyalismong US kag pagganoy sa Pilipinas sa mga operasyon militar sang US. Wala na sang iban nga ibunga ini kundi ang pagpakat sang nagadamo nga tropa, barkong nabal kag kagamitan pang-gyera sang US sa Pilipinas, pareho sang ginahimo sini sa Japan, South Korea kag iban pa. Nakatum-ok ini sa pagpasingki sang paghanda kag pagpangsulsol sang US sa gyera sa rehiyon Asia-Pacific, santo sa estratehikong katuyuan sini nga “punggan” ang pag-uswag sang gahum sang karibal sini nga China.

Ang pagpalargada sang US sang estratehiya sini nagatapak sa sobereniya sang Pilipinas. Ginagapos sini ang Pilipinas sa mga plano sang US kag ginakuhaan ang pungsod sang ikasarang nga maghimo sang kaugalingon nga pagdesisyon sa mga hambalanon pangluwas. Sa pagkiling ni Marcos sa mga plano militar sang US, ginasiraduhan niya ang lain-lain nga posible nga banas, ilabi na ang malinong kag diplomatiko nga dalan, sa pag-atubang sa China agud solbaron ang mga banggaan para sa pareho nga benepisyo. Bisan pa ibutang sa peligro ang kabuhi sang ginatos ka libo nga Pilipino, nagapagamit subong si Marcos kag ang AFP sa US sa plano sini nga painiton ang sitwasyon sa Taiwan sa plano nga garit-gariton ang China nga maghimo sang agresibo nga tikang militar.

Ginapabayaan ni Marcos nga labi nga pahugton sang US ang kontrol sa AFP paagi sa ginatawag nga joint trainings para mag-alalay sa mga tropang Amerikano kag mas magsandig sa mga suplay halin sa militar sang US. Ginapaguwa nila nga “nagabuligay” sila sang mga AFP, bisan ang kamatuoran ginagamit sang US ang AFP bilang mga pyesa sa estratehiya sini nga ipatuman ang hegemoniya ukon gahum sa Asia.

Ang “estratehiya sang pagpugong” sang US isa lang ka pangtabon agud hatagan sang rason ang pagpakat sang mga tropang militar sini sa lain-lain nga bahin sang kalibutan. Imbes nga punggan, labi lang sini nga ginapasaka ang posibilidad nga maglupok ang gyera. Ginapakita sang kasaysayan nga ang pila ka tuig nga agresibo nga pagpakat sang US sang mga pwersang militar kag mga kagamitan pang-gyera sa sidlangan nga bahin sang Ukraine, sa ngalan sang pagpugong sang ekspansyunismo sang Russia, nagtulod sang gyera sadtong 2022.

Labi lang sini nga ginaduso ang paindisanay sa armas, kon diin mas nagadako ang rekurso pangpubliko nga ginawaldas sa pagpauswag kag produksyon sang mga armas pang-gyera, imbes nga italana sa mga kinahanglanon sa sosyal nga serbisyo.

Ang patakaran nga “pagpugong” sang US santo sa ginatawag sini nga Indo-Pacific Strategy nga palibutan ang China paagi sa pagpakat sang kusog militar, partikular na sa mga kadagatan sa sidlangan nga bahin sini. Ang amo sini nga estratehiya mas lang nga magdangat sa pagpasingki sang tensyon militar sa South China Sea kag iban nga bahin sang rehiyon, kadungan sa pagtinguha sang China nga tumbasan ang mga aksyon sang US paagi sa pagpakat sang kaugalingon sini nga mga pwersang nabal kag pangkadagatan. Nagadako ang posibilidad sang sayup nga kalkulasyon nga pwede nga magdangat sa paglupok sang armadong bunggo-anay.

Ginagamit sang US ang Pilipinas nga dalagko nga base militar para sa forward-deployment ukon abanse nga pagpwesto sang mga pang-opensiba nga armas pang-gyera. Sadtong nagligad nga tuig, ginpwesto sang US ang Typhon missile system, sa norte nga bahin sang Luzon. Likom sa publiko ini ginsaylo sa iban nga lokasyon, kag ginakahangaw-an nga yara sa isa ka isla sa Batanes. Sa maabot nga Balikatan war exercises, nga natalana nga pakigbahinan sang kapin sa 10,000 ka tropang Amerikano, plano nga ipwesto sang US ang hinganiban nga NMESIS (Navy Marine Expeditionary Ship Interdiction System), isa ka kontra-barko nga missile system, nga makasarang magpalupad sang misayl sa kalayuon nga 185 kilometro. Plano man nga dal-on kag gamiton sang US Navy sa Pilipinas ang mga “unmanned surface vehicle.”

Kon patihan ang mga pahayag ni Hegseth, natalana nga ituon sang US sa idalum sang gobyernong Trump ang nagadako nga pokus sini sa Asia, lakip sa Middle East, kag isaylo diri ang nagadamo nga pwersa halin sa Europe. Isa ini sa rason nga gusto na nga tapuson ni Trump ang gyera sa Ukraine agud indi na ini mahigot didto.

Sa atubang sang sining sitwasyon, dapat hugot nga maghugpong ang pumuluyong Pilipino kag mabaskog nga ipahayag ang patriyotiko nga singgit nga magbuhi halin sa kontrol militar sang US. Ang kontrol militar nga ini yara sa dagway sang presensya sang linibo ka tropang Amerikano sa mga base militar sini sa Pilipinas, paggamit sang pungsod para sa paglunsar sang mga asod-asod kag wala lang-at nga mga paghanas sa gyera, pagwesto sang mga armas pang-gyera sa mga EDCA site, paghatag sang ayuda militar sa kampanya sang pagpangbomba kag pag-istraping sang AFP batuk sa BHB kag masang mangunguma, kag pagdikta sa “AFP modernization” nga naga-obligar sa AFP nga sa US lang magbakal sang kagamitan, rason nga mas nahigot kag nagasandig ini sa US.

Dapat ubos-kusog nga magprotesta ang pumuluyong Pilipino batuk sa plano nga Balikatan war games, nga mas nga magbutong sa pungsod sa imperyalistang banggianay sa tunga sang US kag China. Dapat pursigido nga iduso ang demanda para sa demilitarisasyon sang South China Sea, kag ang pagresolbar sang mga banggaan pang-kadagatan paagi sa malinong nga dayalogo. Dapat magpanindugan ang pumuluyo para sa gilayon nga pagwasak sang mga base militar, pagpalayas sa tanan nga tropang Amerikano, pagbasura sa Enhanced Defense Cooperation Agreement (EDCA) kag tanan nga indi patas nga tratado militar, kag pag-untat sang ayuda militar sa mapiguson kag pasista nga rehimen Marcos.