Gin-abdak kag ginsakay sa van sang mga katapo sang 96th Military Intelligence Company (MICO) sang 9th ID ang isa ka residente kag mangunguma sa Barangay Cabangcalan, Placer, Masbate sadtong Marso 29, alas-6 sang aga. Ginkilala ang biktima nga si Junior Tuling, 56 anyos.

Daan na nga biktima sang pilit nga “pagpasungka” sang militar si Tuling. Sadtong 2021, pilit siya nga “ginpasungka” sang mga soldado sa kasagsagan sang paglunsar sang Retooled Community Support Program (RCSP). Sa Masbate, madamo na ang kasubong ni Tuling nga “nagsurender” kag pagkatapos kon magpamalibad nga magpagamit sa militar bilang ahente sa paniktik ukon mag-CAFGU gina-ipit sang mga soldado.

Nagapanawagan sang bulig ang pamilya kag himata ni Tuling agud hibaluon ang iya nahamtangan. Demanda nila nga mapasabat ang mga berdugo nga militar kag mahatagan sang hustisya ang biktima. Nagapanawagan sila sa lokal nga upisyal sang barangay nga aksyunan kag maghimo sang mga tikang agud pangitaon ang biktima kag segurohon ang iya kaluwasan.

Sa isa ka separado nga insidente sadtong Marso 27, ginkastigo sang mga tinawo sang 96th MICO si Totong Cuyos, mangunguma kag residente sa Barangay Cabrera, Dimasalang. Magluwas diri, nareport sa ikaduha nga distrito sang Masbate ang lapnagon nga pangpangawat sang militar sa mga sibilyan nga ginapaguwa nga hinimuan sang Bagong Hukbong Bayan.

Pag-aresto. Sa Quezon, gin-aresto sang 85th IB kag mga pulis ang mga sibilyan nga sanday Darwin Palo kag Jay-Ar Molantes sa Lucena Grand Terminal, Lucena City sadtong Marso 27. Ang mga biktima pakadto tani sa Bulacan para didto magtrabaho.

Si Palo, mangunguma nga halin sa banwa sang Lopez sa Quezon, ginbansagan sang mga pulis nga isa sa mga “most wanted” nga kriminal sa rehiyon sang Calabarzon. Suno sa ila, nagaatubang si Palo sang anum ka sampaw-sampaw nga kaso lakip ang madamuan nga pagtilaw nga pagpatay kag paglapas sa Anti-Terrorism Act of 2020. Ginapasibangdan man siya nga kolektor sang BHB-Quezon para sa ginasiling “permit-to-campaign” subong nga eleksyon 2025. Samtang, wala gin-report sang mga pulis ang pagkadakup kay Molantes.

Peke nga pagpasungka. Liwat ginpaguwa sang mga pulis sang Cebu nga “nagsungka” sa ila ang isa ka 25-anyos nga lalaki nga mangunguma nga residente sang Barangay Bonbon, Aloguinsan, Cebu sadtong Marso 28. Ginpaguwa sang mga pulis nga siya “tagasuporta sang BHB.” Suno sa mga residente sang Barangay Bonbon, kon diin may away sa duta ang San Roque Farmers Association, daan na nga ginpaguwa nga “nagsurender” ang amo nga mangunguma.

Samtang, ginkadtuan sang mga soldado sa idalum sang 31st Civil Military Operations (CMO) ang balay sang tsirman sang San Roque Farmers Association (SRFA) sa Barangay Bonbon sadtong Marso 11. Gin-haras kag gingamo sang pito ka soldado si Pio Del Rosario agud punggan siya sa pagkundena kag pagbuyagyag sang militarisasyon kag pagpang-ipit sa ila komunidad.