Pag-ugyon sang Marawi sa pumuluyong Palestino. Kapin sa 800 ka residente sang Marawi City ang naglunsar sang “solidarity run” sa “Ground Zero” sang syudad sadtong Marso 27 bilang pag-ugyon sa pumuluyong Palestino pagkatapos ibasura sang Israel ang untat-lupok kag liwat ginbomba ang Gaza. Naglanog ang singgit sang mga naka-tiil nga tumalambong para “Free Palestine” kag “From the river to the sea, Palestine will be free” sa sadto mapagsik nga komunidad. Tubtob subong, wala pa gihapon nakabalik ang mga residente sa Ground Zero nga patarasak nga ginbomba sang rehimen Duterte sadtong 2017.

Pasaka sukot sa LRT. Nagtipon ang mga mamumugon, estudyante kag imol sa Monumento LRT-1 Station isa ka adlaw antes lubos nga ipasaka ang pamasahe sini sadtong Abril 2. Ginbatikos nila ang pagpamalibad sang rehimen Marcos nga pauntaton ang pagpasaka sang pamasahe kag ibasura ang kontrata sang estado sa pribado nga kumpanya nga nagapadalagan sang serbisyo. Lakip sa mga nagpamatuk ang mga komyuter halin sa Camanava nga may dako nga populasyon sang pumuluyo kag mamumugon nga nagagamit sang serbisyo sang LRT.

Pasaka sukot sa tubig. Nagtipon sadtong Abril 1 ang mga myembro sang Bayan Muna sa atubang sang upisina sang MWSS Regulatory Office sa Quezon City agud kundenahon ang pagsaka sang sukot sa tubig subong nga bulan kag ipanawagan ang #NoToWater RateHike. Nagahana nga ipasaka ang sukot sa tubig sang ₱4-₱5 kada metriko kubiko pagkatapos nga pasugtan sang MWSS.

Pasaka presyo sang mga produktong petrolyo. Nagprotesta sa atubang sang gasolinahan sang Petron ang mga myembro sang Bayan Muna sadtong Marso 30 batuk sa ₱1.40/litro nga pagsaka sang presyo sang lana nga ginpatuman sadtong Marso 31. Sa adlaw nga ini, ginpadala sang Bayan Muna ang sulat sa Department of Energy agud sukton ang departamento sa indi sini paghimo sang tikang agud ipatuman ang mando sang Korte Suprema sadtong 2024 para sa “unbundling” sang presyo ukon pag-obligar sa mga kumpaniya sang lana nga himay-himayon ang presyo sang mga produktong petrolyo kag ipakita ang detalye sa pagpasaka sang mga ini.