Ginatos ka libo nga pumuluyong Amerikano, kadam-an mga mamumugon, ang nagguwa sa mga kadalanan kag parke sadtong Abril 5 sa indi magnubo sa 50 ka estado sa US agud kundenahon ang nanari-sari nga kontra-pumuluyo nga mga patakaran ni Donald Trump kag sa iya bilyunaryo nga tigpanugyan nga si Elon Musk. Ginbana-bana nga kapin sa 250,000 ang nagpakigbahin sa 1,200 ka mga protesta kag pagtililipon sa bug-os nga pungsod.

Gintawag ang mga aksyon bilang protesang “Hands Off!” (ukon Indi mo kami pagsukton!). Panawagan nila nga untaton na nanday Trump kag Musk ang mga atake sa ila mga trabaho, kinamatarung kag kaayuhan. Isa sa pinakadako nga pagtipon sa National Mall sa Washington DC, malapit sa White House, upisyal nga puluy-an kag opisina sang presidente.

Gin-organisa ang mga protesta sang kapin 150 ka grupo, lakip ang mga organisasyon sa kinamatarung sibil, mga unyon sang mamumugon, mga tigtib-ong sang LGBTQ+, mga beterano, kag mga aktibista sa piniliay. Ang mga nagtambong nagpahayag sang pagka-dismaya sa mga pagtilaw ni Trump nga pagamayon ang gobyernong pederal, pagpangkakas sa kapin 200,000 ka trabaho sa gobyerno kag dalagko nga pagbuhin sa mga sosyal nga benepisyo.

Ginpahayag man sang mga nagprotesta ang ila pagkangil-ad sa mga patakaran ni Trump kasubong sang lapnagon nga deportasyon sang mga imigrante, pagbuhin sa pondo para sa edukasyon kag ikaayong lawas, kag pagdula sang mga proteksyon para sa LGBTQ+. Hugot nila nga ginakundenar ang papel ni Musk, ang pinakadako nga oligarko sa kalibutan, sa Department of Government Efficiency, nga nagpatuman sang pagpangkakas sa indi magnubo sa 30,000 ka empleyado sang gobyerno.

Ginalaragway sang mga protestang “Hands Off” ang masingki kag lapnagon nga kaakig sang nagadamo nga Amerikano kay Trump, tatlo ka bulan pa lang halin sang magpungko siya sa White House sa ikaduha nga higayon. Naglunsar man sang mga protesta ang mga Amerikano nga yara sa guwa sang US, kasubong sang France, Germany, United Kingdom kag Portugal.