Sa sulod sang Bagong Hukbong Bayan (BHB), nanari-sari nga propesyon ang natun-an sang mga Pulang hangaway. Sa pagsulong sang gyera, nagatungod man sila bilang titser, abogado, artista, manugkanta, nars ukon doktor kag iban pa nga trabaho, tanan para sa interes sang masang pigos.

Ini ang natun-an ni Kaupod Sey, isa ka pamatan-on nga hangaway nga subong nagahulag sa rehiyon sang Bicol. Halin pa pagkabata, handum na niya nga mangin doktor apang kahibalo siya nga indi masarangan sang iya mga ginikanan nga pa-eskwelahon siya sang medisina.

“Ano man ang mahimo sang duha ka ektarya nga duta sa lima ka mag-ulutod nga sa kapigado sang pangabuhi isa ka kahig, wala sang halos matuka,” siling niya. Kahibalo si Sey nga “milyones” ang kinahanglanon para maka-eskwela kag makatapos sa burges nga eskwelahan. Literal lang siya nga “nakatapak” sa kolehiyo tungod indi masarangan nga gastuhan sang iya magamay nga sweldo halin sa pagka “working student” ang mga galastuhan sa pag-eskwela.

Indi bag-o kay Ka Sey ang rebolusyonaryong kahublagan. Aktibo nga mga katapo sang Partido sa lokalidad ang iya mga ginikanan. Nagdako siya nga masami nila makasalamuha ang mga kaupod.

“Naganyat” siya sa BHB, rason sang iya pagpatapo sa hukbo sang banwa. “Lain gid ang dating sang NPA sa akon. Kon magkadto ako sa ila kag kon magpauli na ako sa balay daw may kulang sa akon,” siling niya. “Daw love at first sight.”

Sa sulod sang hukbo, amat-amat niya nga napadalum ang iya paghangup sa mga bagay-bagay. Kaupod ang pareho niya nga hangaway, gintun-an niya ang sosyedad kag rebolusyon, nagpangahas nga ipraktika ang mga natun-an diri.

“Apang ang pinaka-eksayting, diri pwede ko gali padayunon ang handum ko – ang mangin doktor!” siling ni Ka Sey.

Sang sini lang, nakatapos siya, kaupod ang 11 pa halin sa lain-lain nga yunit sang BHB-Bicol, sang paghanas medikal nga ginlunsar sa isa ka larangan gerilya sang Norben Gruta Command. Dako nga kadalag-an ini sa pagsulong sang rebolusyonaryong hilikuton. Ginhanda sini ang mga Pulang hangaway para maghatag sang libre nga serbisyo medikal sa masang mangunguma.

Sa iya pagtapos, nangin lubos nga kombat medik si Ka Sey.