Ginkakas sa poder si South Korean President Yoon Suk Yeol sadtong Abril 4 pagkatapos pabakuron sang Constitutional Court ang impeachment sa iya sang parlyamento sadtong Disyembre 14, 2024. Naghalin ini sa pagdeklarar ni Yoon sang layi militar sadtong Disyembre 3, 2024, nga ginkabig nga isa ka pagtilaw sang kudeta.

Tungod ginkakas na sa pagka-presidente, pwede na nga mapaatubang sa dugang nga mga kaso si Yoon. Samtang, kinahanglan nga makahiwat sang ispesyal nga eleksyon sa South Korea sa sulod sang 60 ka adlaw.

Ang desisyon sang korte ginkalipay sang minilyon ka pumuluyo nga nagpakigbahin sa mga protesta sa kadalanan. Apang, nagpanawagan ang Korean Confederation of Trade Unions (KCTU) kag Nodutdol, grupo sang mga Korean nga nakabase sa US, sang tayuyon nga hublag sang pumuluyong Koreano para sa himpit nga demokrasya sa pungsod kag pagkalas sa okupasyon sang US kag pagtapos sa kapitalista nga pagpang-ulipon sa ila nga pungsod.