Ululupod nga nagapakig-away ang mga manunudlo kag empleyado sang mga pribado kag pangpubliko nga unibersidad agud itib-ong ang ila mga kinamatarung kag kaayuhan. Paagi sa pakig-negosasyon para sa ila collective bargaining agreemement (CBA), ginapakig-away sang mga unyon sang mga manundulo ang makatarungan nga sweldo, mga benepisyo kag iban pa nga kinamatarung.

Sadtong Marso 25, nagkadto sa upisina sang National Conciliation and Mediation Board (NCMB) sang Department of Labor and Employment (DOLE) sa Intramuros sa Manila ang University of Santo Tomas Faculty Union (USTFU) para maghapag sang notice of strike. Nagdesisyon ang unyon nga ihapag ini pagkatapos ang masobra isa ka tuig nga indi paghisugot sa administrasyon sa hambalanon sang CBA para sa 2021-2026.

Nagdeklarar ang unyon sang deadlock sadtong Marso 14 tungod sa indi mabaton nga mga tanyag sang administrasyon. Lakip sa ginagiit sang USTFU ang 100% nga benepisyo sa ikaayong lawas para sa tanan nga katapo sang unyon, mas mataas nga badyet para sa mga promosyon, kag iban pa nga benepisyo.

Naglunsar sang gab-i sang pagpangamuyo kag pakig-isa ang USTFU sa kampus sadtong Marso 26, isa ka adlaw pagkatapos maghapag sang pahibalo nga welga. Nagtambong kag nakig-isa sa ila hublag ang mga katapo sang Ugnayan ng mga Nagkakaisang Manggagawa ng UST Hospital kag mga pamatan-on nga Tomasino.

Sa Lyceum of the Philippines University (LPU), nagdesisyon man ang Lyceum Faculty Association (LFA) nga maghapag sang notice of strike sadtong Marso 26 tungod sa deadlock sa negosasyon para sa CBA. Ginagiit sang LFA sa CBA ang dugang nga sweldo, alawans, kag pagpakakas sang pilit nga pagparetiro pagkatapos sang 20 ka tuig nga serbisyo sang mga manunudlo.

Wala labot sa UST kag LPU, sa subong nagagulong man ang negosasyon sang mga unyon sang mga manunudlo sa Siliman University kag Centro Escolar University.

Samtang, napaatras sang mga empleyado sang Benguet State University (BSU) nga napaidalum sa sistemang Job Order (JO) kag Contract of Service (COS) ang isa ka indi makatarungan nga kasugtanan nga ginapilit sa ila sang administrasyon. Sadtong Marso 24, ginpilit sang BSU ang mga JO/COS nga magsulod sa kasugtanan nga nagasiling nga makabaton lang sila sang sweldo sa panahon nga may yara sang bastante nga pondo ang unibersidad.

Antes pa ang kontrobersyal nga kontrata, permanente na nga nagakaatrasar ang sweldo sang mga kontraktwal. Suno sa mga report, wala pa nila nabaton ang sweldo para sa Pebrero samtang may pila nga wala pa nakabaton sang para sa Enero.

Sa pagkabuyagyag sang ila kahimtangan sa publiko, napilitan ang BSU nga magpaguwa sang pahayag kag pagpaathag angot diri. Nagrason ang administrasyon sang unibersidad nga kulang gid subong ang pondo apang segurado kuno nga bayaran nila ang mga JO/COS.

Sa mga away kag paghimakas nga ini sang mga manunudlo, nagpahayag sang bug-os nga suporta sa ila ang Alliance of Concerned Teachers kag mga tsapter sini.