Ginsug-alaw sang mga protesta sang mga progresibo nga grupo ang pagbisita sa Pilipinas sang bag-o nga tiglikom sa depensa sang US nga si Peter Hegseth sadtong Marso 28. Yari sa pungsod si Hegseth tubtob Marso 29, para pulungon ang mga upisyal sa depensa kag militar sang Pilipinas agud iduso ang mapang-gyera nga adyenda sang US sa Pilipinas kag sa Asia.

Isa sa adyenda ni Hegseth ang pagtambak sang mga gamit-militar sang US sa pungsod, santo sa estratehikong katuyuan sini nga palibutan ang China gamit ang first-island chain. Pagkatapos nga mapwesto ang Typhon Missile System sa norte sang Pilipinas, plano naman sang US nga ipwesto sa pungsod ang NMESIS (Navy Marine Expeditionary Ship Interdiction System).

Ang NMESIS isa ka sistema sang misayl nga anti-ship ukon nagapalupok sang barko. Ginakarga ini sa isa ka unmanned ground vehicle (dako nga trak) nga ginatawag nga ROGUE Fires Carrier kag may karga nga Naval Strike Missile (NSM). Ang NSM mga misayl nga pwede maglupad sang tubtob 185 kilometro mga “stealth feature” agud indi matumod. Ang sistema nga ini ginagamit sang US Marine Corps para sa malagyo nga mga atake batuk sa mga barko halin sa duta.

Kadungan sang NMESIS, magadeploy ang US sang mga unmanned surface vessel nga gamiton sang US sa South China Sea. Kinaandan nga magagmay kag portable nga mga “drone” nga pangdagat ini; kag naka-desenyo para sa malain nga panahon sa kadagatan kag makitid nga alagyan sang tubig. Kargado ang mga ini sang mga sensor, kamera, sistemang ISR kag sonar. Pwede ini direkta ukon indi direkta nga kontrolon sang tawo. Ginagamit ini para sa pagpaniktik, sarbeylans, rekorida kag pagdirehir sang trapik sa dagat.

Ang mga gamit nga ini uyatan sang gintukod nga Littoral Rotational Force-Luzon sang 3rd Marine Littoral Regiment sang US. Pareho sang mga nauna nga “rotational force,” mangin permanente ang presensya sini sa kadagatan kag mga baybayon sang Pilipinas, lapas sa reaksyonaryo nga konstitusyon nga nagadumili sa presensya sang mga dumuluong nga tropa. “Ipakilala” ang permanente nga pwersa nga ini sa maabot nga Balikatan 2025, kon diin gamiton sang US ang Pilipinas bilang lunsaran sini sang gyera batuk sa China.