Ginsikmit ngan iginsakay ha van han mga kaapi han 96th Military Intelligence Company (MICO) han 9th ID an usa nga residente ngan parag-uma ha Barangay Cabangcalan, Placer, Masbate hadton Marso 29, alas-6 han aga. Ginkilala an biktima nga hi Junior Tuling, 56-anyos.

Biktima na hadto han piniritay nga “pagpapasurender” han militar hi Tuling. Hadton 2021, piniritay hiya nga “ginpasurender” han mga sundalo ha butnga han paglalansar han Retooled Community Support Program (RCSP). Ha Masbate, damo na an kapareho ni Tuling nga “sinurender” ngan kahuman diniri nga magpagamit ha militar komo ahente ha paniktik o mag-CAFGU gin-gigipit han mga sundalo.

Nanawagan hin bulig an pamilya ngan kaurupdan ni Tuling agud hibaruan an iya kinamumutangan. Hangyo nira nga mapabaton an mga berdugo nga militar ngan matagan hustisya an biktima. Nanawagan hira ha lokal nga upisyal han barangay nga umaksyon ngan maghimo hin mga pitad agud sulsugon an biktima ngan seguruhon an iya katalwasan.

Ha usa nga bulag nga insidente hadton Marso 27, ginkastigo han mga tawuhan han 96th MICO hi Totong Cuyos, parag-uma ngan residente ha Barangay Cabrera, Dimasalang. Labot hini, nahireport ha ikaduha nga distrito han Masbate an samwak nga pangawat han militar ha mga sibilyan nga ginpapagawas nga binuhatan han Bagong Hukbong Bayan.

Pag-aresto. Ha Quezon, gin-aresto han 85th IB ngan mga pulis an mga sibilyan nga hira Darwin Palo ngan Jay-Ar Molantes ha Lucena Grand Terminal, Lucena City hadton Marso 27. Tikadto unta an mga biktima ha Bulacan agud didto magtrabaho.

Hi Palo, parag-uma tikang ha bungto han Lopez ha Quezon, ginbansagan han mga pulis nga usa ha mga “most wanted” nga kriminal ha rehiyon han Calabarzon. Sigon ha ira, naatubang hi Palo ha unom nga luun-luon nga kaso kalakip an tinagdamo nga gin-atentar nga pagpatay ngan pagtalapas ha Anti-Terrorism Act of 2020. Gin-aakusahan liwat hiya nga kolektor ha BHB-Quezon para ha ginsesering nga “permit-to-campaign” yana nga eleksyon 2025. Samtang, waray igreport han mga pulis an kadakop kan Molantes.

uwa nga pagpasurender. Utro nga ginpapagawas han mga pulis han Cebu nga “sinurender” ha ira an usa nga 25-anyos nga lalaki nga parag-uma nga residente han Barangay Bonbon, Aloguinsan, Cebu hadton Marso 28. Ginpapagawas han mga pulis nga hiya “tagasuporta han BHB.” Sigon ha mga residente han Barangay Bonbon, diin mayda pakigbisog ha tuna an San Roque Farmers Association, hadto pa ginpapagawas nga “sinurender” an nasering nga parag-uma.

Samtang, ginkadto han mga sundalo ha ilarum han 31st Civil Military Operations (CMO) an balay han tsirman han San Roque Farmers Association (SRFA) ha Barangay Bonbon hadton Marso 11. Ginharas ngan ginringgal han pito nga sundalo hi Pio Del Rosario agud pugngan hiya ha pagsukna ngan pagbuksas ha militarisasyon ngan pananalumpigos ha ira komunidad.