Ha sakob han Bagong Hukbong Bayan (BHB), magkalain-lain an propesyon nga nahibabaruan han mga Pula nga mangaraway. Ha pagpasulong han gerra, napapel liwat hira komo mga magturutdo, abogado, artista, paragkanta, nars o doktor ngan iba pa nga trabaho, ngatanan para ha interes han masa nga tinalumpigos.

Ini an nahibaruan ni Kasamang Sey, usa nga batan-on nga mangaraway nga nagios yana ha rehiyon han Bicol. Tikang kabata, hingyap na niya nga magin doktor kundi maaram hiya nga diri akos han iya mga kag-anak nga paeskoylahon hiya hin medisina.

“Pira naman an duha kaektarya nga tuna ha lima nga magburugto nga ha kuri han kinabuhi usa nga kahig, waray haros matuka,” sering niya. Maaram hi Ka Sey nga “milyones” an kinahanglan agud makag-eskoyla ngan makatangpos ha burgis nga eskoylahan. Literal la hiya nga “nakatamak” ha kolehiyo tungod kay diri akos batunon han iya guti nga suhol tikang ha pagin “working student” an mga kagarastuhan ha eskoylahan.

Diri bag-o kan Ka Sey an rebolusyunaryo nga kagiusan. Aktibo nga mga kaapi han Partido ha lokalidad an iya mga kag-anak. Dinako hiya nga agsub nira nga nakakaestorya an mga kasama.

“Nabaysayan” hiya ha BHB, rason han iya pag-api ha hukbo han katawhan. “Iba talaga an dating han NPA ha ak. Ha kada napakadto ako ha ira ngan kada nauli na ako ha balay, baga may kulang ha akon,” sering niya. “Baga hin love at first sight.”

Ha sakob han hukbo, hinay-hinay niya nga napahilarum an iya pagsantop ha mga butang. Kaupod an igkasi niya mangaraway, gin-adman niya an katilingban ngan rebolusyon, maisugon nga iginsapraktika an mga nahibaruan hini.

“Kundi an pinaka-eksayting, dinhi poyde ko ngay-an ipadayon an hingyap ko—an magin doktor!” sering ni Ka Sey.

Diri pala maiha, nagtangpos hiya, kaupod an 11 pa tikang ha magkalain-lain nga yunit han BHB-Bicol, han medikal nga pagpapahiara nga iginlansar ha usa nga prente gerilya han Norben Gruta Command. Dako nga kadaugan ini ha pagpasulong han rebolusyunaryo nga buruhaton. Igin-andam hini an mga Pula nga mangaraway agud maghatag hin libre nga serbisyo medikal ha masa nga parag-uma.

Ha iya pagtangpos, nagin hul-os nga kombat medik hi Ka Sey.