Gintapo han protesta han mga progresibo nga grupo an pagbisita ha Pilipinas han bag-o nga sekretaryo ha depensa han US nga hi Peter Hegseth hadton Marso 28. Aada ha nasud hi Hegseth tubtub Marso 29, agud mitingon an mga upisyal ha depensa ngan militar han Pilipinas agud iduso an makiggerrahon nga adyenda han US ha Pilipinas ngan ha Asia.

Usa ha adyenda ni Hegseth an pagtambak hin mga higamit militar han US ha nasud, subay ha estratehiko nga katuyuanan hini nga palibutan an China gamit an first-island chain. Kahuman igpusisyon an Typhon Missile System ha norte han Pilipinas, plano naman han US nga igpusisyon ha nasud an NMESIS (Navy Marine Expeditionary Ship Interdiction System).

An NMESIS usa nga sistema han misayl nga anti-ship o pampasabog han barko. Nakakarga ini ha usa nga unmanned ground vehicle (dako nga trak) nga gintatawag nga ROGUE Fires Carrier ngan may karga nga Naval Strike Missile (NSM). An mga NSM, mga misayl nga poyde lumupad hin tubtub 185 kakilometro nga mga “stealth feature” para diri ini abaton. Ini nga sistema gin-gagamit han US Marine Corps para ha panhirayuan nga mga atake kontra ha mga barko tikang ha tuna.

Kadungan han NMESIS, magdedeploy an US han mga unmanned surface vessel nga gagamiton han US ha South China Sea. Kasagaran gudti ngan portable ini nga mga pankadagatan ng “drone,” ngan nakadisenyo para ha maraut nga panahon ha kadagatan ngan hagligot nga aragianan han tubig. Kargado ini han mga sensor, kamera, sistema nga ISR ngan sonar. Poyde ini nga direkta o diri direkta nga kontrolon han tawo. Gin-gagamit ini para ha paniktik, sarbeylans, pagrekon, ngan pagdiriher han trapik ha dagat.

Kakatinan ini nga higamit han ginbug-os nga Littoral Rotational Force-Luzon han 3rd Marine Littoral Regiment han US. Sugad han mga nahiuna nga “rotational force,” magigin pirmihan an presensya hini ha kadagatan ngan mga baybayon han Pilipinas, sukwahi ha reaksyunaryo nga konstitusyon nga nagdidiri ha presensya han mga langyaw nga tropa. “Igpapakilala” ini nga permanente nga pwersa ha tiarabot nga Balikatan 2025, diin mangunguna ini ha hihimuon nga “full battle test” kun diin gagamiton han US an Pilipinas komo lansaran hini han gerra kontra ha China.