Waray malipay an liderato han Moro Islamic Liberation Front (MILF) ha pagtudlok ni Ferdinand Marcos Jr kan Abdulraof Macacua komo bag-o nga temporaryo nga puno nga ministro han Bangsamoro Transition Authority (BTA). Sigon ha pahayag nga iginpagawas han Komite Sentral hini, waray ginhimo nga konsultasyon hi Marcos ngan sukwahi ini ha rekomendasyon nga igpabilin an presente nga puno nga ministro nga hi Ahod Ebrahim (Al Haj Murad). Mas suok ha rehimen Marcos hi Macacua, nga usa liwat nga lider han MILF.

Ha mando ni Marcos, gintudlok hi Murad nga usa nala ha 80 nga panrehiyon nga tinaglawas, butang nga waray niya karawton. Gintudlok hi Murad ha BTA hadton 2019 han hadto anay presidente Rodrigo Duterte. Hiya an presente nga tsirman han MILF ngan commander-in-chief han Bangsamoro Islamic Armed Forces, an armado nga pwersa han MILF.

Talapas ha pinal nga kasarabutan nga pankamurayawan nga iginsabalaud komo Bangsamoro Organic Law (BOL) an butaray nga panginginlabot han rehimen Marcos ha pansakob nga proseso han MILF. Gintatamakan hini an mga probisyon kun diin nakasurat an “prinsipyo han otonomiya” han grupo. Nahipasar ini nga balaud ha panahon pa han rehimen Aquino, kundi tubtub yana waray pa ini hul-os nga mahipatuman tungod kay diri pa nahilalansar an syahan nga eleksyon para ha otonomo nga gubyerno nga Bangsamoro.

Talapas liwat ha BOL an pagtudlok ni Marcos ha 34 la ha 41 nga tawuhan han MILF ha BTA. Nakasurat ha BOL nga an BTA prinsipal nga pagdudumaraon han MILF, segundaryo han mga pwersa han Moro National Liberation Front ngan hirayo nga ikatulo han diri-Moro nga mga minoriya nga katawhan. Nawara an mayoriya nga pusisyon han MILF han saliwnan ni Marcos an 70 nga tawuhan hini hadton Marso 3.

Ha panginginlabot han rehimen ha BTA, ginpapaluya ni Marcos an kredibilidad han pamunuan han MILF. Ha pagtina ngan pagbalewaray hini ha mga rekomendasyon han MILF, epektibo nga ginkuhaan ni Marcos han katungod an MILF nga pamunuan han BTA nga yana nagdudumara ha BARMM. Ginruruba liwat hini an pagtapod han katawhan Moro ha proseso han kamurayawan.

Ha pagbalewaray han Gubyerno han Pilipinas ha mga probisyon ha BOL, iginpakita hini an kamalimbong han GRP, ngan han rehimen Marcos ha partikular, ha ginsulod hini nga kasarabutan ha pakikig-erestorya pankamurayawan.