Naglansar hin magkalain-lain nga aktibidad an mga organisasyon nga kaparte han National Democratic Front of the Philippines (NDF) ha mga syudad ngan sentro nga bungto komo pagselebrar han ika-56 nga anibersaryo han Bagong Hukbong Bayan (BHB) hadton Marso 29. Ginpasidunggan nira an mga Pula nga mangaraway ngan kumander han BHB ha ira diri nababantad nga rebolusyunaryo nga diwa ha pagpasulong han armado nga pakig-away ha kabaryuhan.

Ha Manila, naghimo hin pakilat nga rali an masobra 60 nga membro han Kabataang Makabayan (KM) ha Earnshaw, Sampaloc hadton Marso 31. Dara han mga membro han KM an mga litrato nira Kasamang Jose Maria Sison, Kasamang Benito Tiamzon ngan Kasamang Wilma Austria-Tiamzon. Ginpasidunggan nira an tulo, ngan iba pa, nga nagbuhis han ira kinabuhi ngan naghalad han panahon para ha pagpasulong han rebolusyon Pilipino.

Hadton Marso 30, usa nga martsa an iginlansar han KM, Liga ng Agham para sa Bayan, Katipunan ng mga Gurong Makabayan, Revolutionary Organization of Lumads, Cordillera People’s Democratic Front, ngan Katipunan ng mga Samahang Manggagawa ha sakob han University of the Philippines-Diliman ha Quezon City.

Nagkamayda liwat han halipot nga programa an KM-Kira Mindoro ha sakob han Polytechnic University of the Philippines (PUP)-Manila hadton Marso 29. Dara nira an usa nga dako nga balatengga, ngan mga bandera han Partido, BHB ngan NDF nga ira iginsab-ong ha ika-upat ngan ikalima nga andana han bilding ha kampus kahuman han programa.

Wala-tuo liwat an mga operasyon-pilit ngan operasyon-pintar han mga rebolusyunaryo nga organisasyon para ha anibersaryo. Nakit-an an mga pintar, poster, istiker ngan iba pa nga obra han KM ha PUP-Manila, De La Salle University-Manila, College of Saint Benilde ngan Rizal Avenue ha Manila.

Nagpintar liwat ngan nagsab-ong hin mga poster an Christians for National Liberation ha kahilab-on han Aurora Boulevard Extension ha Quezon City. Iginlansar liwat han KM-SMR an pagpilit han mga pahayag ngan istiker ha mga unibersidad ha rehiyon han Davao, balwarte han mga Duterte.

Nagpagawas liwat han pahayag an magkalain-lain nga panrehiyon nga tsapter han NDF ngan mga organisasyon ilarum hini hin pagbati ha anibersaryo han BHB. Sugad liwat, nagpaabot hin pagbati ha anibersaryo an pira ha internasyunal nga mga Partido ngan organisasyon kaupod an Friends of the Filipino People in Struggle, Caidre na Filipínigh Committee han Anti-Imperialist Action Ireland ngan Communist Party of Australia (Marxist-Leninist).