Pakig-usa han Marawi ha katawhan nga Palestino. Sumobra-kumulang 800 nga residente han Marawi City an naglansar han “solidarity run” ha “Ground Zero” han syudad hadton Marso 27 komo pakig-usa ha katawhan Palestino kahuman igbasura han Israel an ukoy-bubto ngan utro nga ginbomba an Gaza. Nag-aningal an guliat han mga nakahuplag nga delegado para ha “Free Palestine” ngan “From the river to the sea, Palestine will be free” ha hadto marayhak nga komunidad. Tubtub yana, diri pa gihap nakakabalik an mga residente ha Ground Zero nga waray wantas nga ginbomba han rehimen Duterte hadton 2017.

Dugang-sukot ha LRT. Nagtirok an mga trabahador, estudyante ngan kablas ha Monumento LRT-1 Station usa kaadlaw antes hul-os nga pahitas-on an pamasahe hini hadton Abril 2. Ginsukna nira an pagdumiri han rehimen Marcos nga ipahunong an paghitaas han pamasahe ngan pawarayan-pulos an kontrata han estado ha pribado nga kompaniya nga nagpapadalagan han serbisyo. Kaupod ha mga tumipa an mga komyuter (pasaheros) tikang ha Camanava nga mayda dako nga populasyon han katawhan ngan trabahador nga nagamit ha serbisyo ha LRT.

Dugang-sukot ha tubig. Nagtirok hadton Abril 1 an mga membro han Bayan Muna ha atubangan han upisina han MWSS Regulatory Office ha Quezon City agud suknaon an dugang-sukot ha tubig yana nga bulan ngan igpanawagan an #NoToWaterRateHike. Namamangpangan nga pahitas-on an sukot ha tubig hin ₱4-₱5 kada metriko kubiko kahuman tugutan han MWSS.

Dugang-presyo han mga produkto nga petrolyo. Nagprotesta ha atubangan han gasolinahan han Petron an mga membro han Bayan Muna hadton Marso 30 kontra ha ₱1.40/litro nga umento han presyo han lana nga iginpatuman hadton Marso 31. Ini nga adlaw, iginpadara han Bayan Muna an surat ha Department of Energy para sukton an departamento ha kawaray hini pitad agud ipatuman an kamanduan han Korte Suprema hadton 2024 para ha “unbundling” han presyo o pag-obliga ha mga kompaniya han lana nga guta-gutaon an presyo han mga produkto nga petrolyo ngan igpakita an detalye ha pagpahitaas hini.