Gatus-gatos kayukot nga katawhan Amerikano, kadam-am mga trabahador an rumabunos ha kakalsadahan ngan parke hadton Abril 5 ha diri mamenos ha 50 nga estado ha US agud suknaon an dirudilain nga kontra-katawhan nga mga palisiya ni Donald Trump nga han iya bilyunaryo nga tagsagdon nga hi Elon Musk. Gintatantiya nga inabot ha 250,000 an pinartisipar ha 1,200 nga protesta ngan katitirok ha bug-os nga nasud.

Ini nga mga aksyon gintawag komo protesta nga “Hands Off!” (o Ayaw kami paglabti!). Panawagan nira nga undangon na nira Trump ngan Musk an mga atake ha ira mga trabaho, katungod ngan kaupayan. Usa ha pinakadako an katitirok ha National Mall ha Washington DC, hirani ha White House, upisyal nga urukyan ngan upisina han presidente.

Gin-organisa an mga protesta han masobra 150 nga grupo, kaupod an mga organisasyon ha sibil nga katungod, mga unyon han trabahador, mga tag-undong han LGBTQ+, mga beterano, ngan mga aktibista ha eleksyon. Nagpahayag an mga delegado hin kasubo ha mga larang ni Trump nga pagution an pederal nga gubyerno, pagtanggal ha masobra 200,000 nga trabaho ha gubyerno ngan dagko nga pag-iban ha mga pankatilingban nga benepisyo.

Iginpahayag liwat han mga nagprotesta an ira kangalas ha mga palisiya ni Trump sugad han hiluagan nga deportasyon han mga imigrante, pag-iban ha pondo para ha edukasyon nga kalibsugan, ngan pagtanggal ha mga proteksyon para ha LGBTQ+. Mahugot nira nga ginsukna an papel ni Musk, an pinakadako nga oligarko ha kalibutan, ha Department of Government Efficiency, nga nagpatuman ha pagpatanggal ha diri mamenos ha 30,000 nga empleyado han gubyerno.

Gin-eespiho han mga protesta nga “Hands Off” an grabe ngan hiluag nga kangalas han tikadamo nga Amerikano kan Trump, tulo kabulan pala tikang han lumingkod hiya ha White House ha ikaduha nga higayon. Naglansar liwat hin mga protesta an mga Amerikano nga aada ha gawas han US, sugad ha France, Germany, United Kingdom ngan Portugal.