Ginios an masa nga Mindoreño ha duha nga magkabulag nga higayon agud atuhan an panruba ha kalibungan ngan para depensahan an ira pakabuhi.

Hadton Marso 23, nagtirok an mga residente han Barangay Talabaan, Mamburao, Occidental Mindoro hadton Marso 23 para ha usa nga prayer rally kontra ha mapanhibang ngan mapan-uwat nga operasyon nga dredging han PERRC Construction and Development Corporation.

Sigon ha Mindoro Forum Network (MFN), gintikangan han kompaniya an dredging ha tahub han “river restoration” han Salog han Pagbahan. Kundi, waray ini mag-ukad ha igintalaan nga lugar ha gibwangan han salog. Lugod nag-ukad ini ha kadagatan nga pira kakilometro tikang ha baybayon han barangay. Tungod hini, diri na makapalawod an mga parupangisda. Waray na hira nadadakop tungod kay natatabrog an mga isda han aringasa ha haros 18 kaoras nga pag-inukad han barko hini.

Hadton Pebrero 25, temporaryo nga ginpaundang han Gubyerno han Bungto han Mamburao an dredging han kompaniya kahuman makakarawat hin mga reklamo tikang ha mga residente han Barangay Talabaan. Ha ira paggios, panawagan nira nga permanente na nga paundangon an operasyon han kompaniya ngan ipreserba an kadagatan, labina an mga bakulod dinhi. Nanawagan liwat hira ha gubyerno nga depensahan an mga parupangisda ngan an ira pakabuhi.

Samtang, duruyog nga nagtaud han kandila an mga membro han Samahan ng mga Magsasaka sa Guinobatan (SMG) ngan MFN ha atubangan han city hall han Calapan City, Oriental Mindoro hadton gab-i han Marso 28 agud manawagan ha lokal nga gubyerno nga pugngan an pagkudal han usa nga korporasyon ha Barangay Guinobatan. Usa kaadlaw antes hini, inabot an tawuhan han MENAKOR Corporation ngan piniritay nga nagtindog han kudal subay ha permit nga iginhatag han barangay. Gin-aangkon han MENAKOR, nga pananag-iya ni Jolly Lim Ting, an 158 kaektarya nga tuna ha barangay.

Sigon ha mga residente, waray iginhimo nga tukma nga konsultasyon ha ira an barangay. Apektado ura-ura han pagkudal an mga tuna, pakabuhi ngan puruy-anan han mga residente nga pira kahenerasyon na nga inukoy ngan nagtrabaho dinhi.

Sigon ha SMG, 1998 pa han magtikang nga ipanhatag han Department of Agrarian Reform (DAR) ha mga parag-uma han Guinobatan an Certificate of Land Ownership Award o CLOA. Kundi hasta yana, padayon nga naatubang ha panlulupot han tuna an mga parag-uma. Gintatantiya nga 600 kapamilya an mapapalayas hini nga panlulupot.