Nagkakaurusa nga naato an mga magturutdo ngan empleyado han mga pribado ngan pampubliko nga unibersidad agud ig-undong an ira mga katungod ngan kaupayan. Pinaagi han pakikignegosasyon para ha ira collective bargaining agreemement (CBA), iginpapakigbisog han mga unyon han mga magturutdo an makatadungan nga sweldo, mga benepisyo ngan iba pa nga katungod.

Hadton Marso 25, kinadto ha upisina han National Conciliation and Mediation Board (NCMB) han Department of Labor and Employment (DOLE) ha Intramuros ha Manila an University of Santo Tomas Faculty Union (USTFU) agud magsalawad han notice of strike. Nagdesisyon an unyon nga isalawad ini kahuman an masobra usa katuig nga diri pagkakaabuyon ha administrasyon ha karukayaknon han CBA para ha 2021-2026.

Nagdeklara an unyon hin deadlock hadton Marso 14 tungod ha diri makaru-karawat nga mga tanyag han administrasyon. Kalakip ha igin-iinsister han USTFU an 100% nga benepisyo ha kalibsugan para ha ngatanan nga kaapi han unyon, mas hitaas nga badyet para ha mga promosyon, ngan iba pa nga benepisyo.

Naglansar han gab-i han pag-ampo ngan pakig-usa an USTFU ha kampus hadton Marso 26, usa kaadlaw kahuman magsalawad hin pahibaro han welga. Tinambong ngan nakig-usa ha ira paggios an mga kaapi han Ugnayan ng mga Nagkakaisang Manggagawa ng UST Hospital ngan mga kabatan-unan nga Tomasino.

Ha Lyceum of the Philippines University (LPU), nagdesisyon na gihap an Lyceum Faculty Association (LFA) nga magsalawad han notice of strike hadton Marso 26 tungod ha deadlock ha negosasyon para ha CBA. Igin-iinsister han LFA ha CBA an dugang nga suhol, alawans, ngan pagpatanggal han piniritay nga pagreretiro kahuman an 20 katuig nga serbisyo han mga magturutdo.

Labot ha UST ngan LPU, presente liwat nga nadalagan an negosasyon han mga unyon han mga magturutdo ha Siliman University ngan Centro Escolar University.

Samtang, napaatras han mga empleyado han Benguet State University (BSU) nga nakapailarum ha sistema nga Job Order (JO) ngan Contract of Service (COS) an usa nga diri makatadungan nga kasarabutan nga iginpipirit ha ira han administrasyon. Hadton Marso 24, ginpirit han BSU an mga JO/COS nga sumakob ha kasarabutan nga nasering nga makakarawat la hira han sweldo ha panahon nga mayda sadang nga pondo an unibersidad.

Antes pa an kontrobersyal nga kontrata, permihan na nga nadedelatar an sweldo han mga kontrakwal. Sigon ha mga sumat, waray pa nira makakarawat an sweldo para ha Pebrero samtang mayda pira nga waray pa makakarawat han para ha Enero.

Ha kabuksas han ira kamutangan ha publiko, napiritan an BSU nga magpagawas han pahayag ngan pagkaklaro kasumpay dinhi. Nagrason an administrasyon han unibersidad nga kulang gud yana an pondo kundi piho kuno nga babaydan nira an mga JO/COS.

Hini nga mga agway ngan pakigbisog han mga magturutdo, nagpahayag han hul-os nga suporta ha ira an Alliance of Concerned Teachers ngan mga tsapter hini.