Naghiusa sa pakigbisog ang mga magtutudlo ug empleyado sa mga pribado ug publikong unibersidad aron ipanghingusog ang ilang mga katungod ug kaayuhan. Pinaagi sa pakignegosasyon alang sa ilang collective bargaining agreement (CBA), gipaduso sa mga unyon sa mga magtutudlo ang makatarunganong sweldo, mga benepisyo ug uban pang katungod.

Niadtong Marso 25, miadto sa upisina sa National Conciliation and Mediation Board (NCMB) sa Department of Labor and Employment (DOLE) sa Intramuros sa Maynila ang University of Santo Tomas Faculty Union (USTFU) aron magsumite og notice of strike. Nagdesisyon ang unyon nga ipasaka kini human ang kapin usa ka tuig nga dili pagsinabtanay sa administrasyon sa hisgutanan sa CBA alang sa 2021-2026.

Nagdeklara ang unyon og deadlock niadtong Marso 14 tungod sa dili pabor kanila nga mga tanyag sa administrasyon. Lakip sa ginaduso sa USTFU ang 100% benepisyo sa panglawas alang sa tanang myembro sa unyon, mas taas nga badyet para sa mga promosyon, ug uban pang benepisyo.

Naglunsad og gabii sa pag-ampo ug pakighiusa ang USTFU sa kampus niadtong Marso 26, usa ka adlaw human nagsumite og notice of strike. Misalmot ug nakighiusa sa ilang protesta ang mga myembro sa Ugnayan ng mga Nagkakaisang Manggagawa sa UST Hospital ug mga kabatan-onang Tomasino.

Sa Lyceum of the Philippines University (LPU), nagdesisyon na usab ang Lyceum Faculty Association (LFA) nga magpasaka og notice of strike niadtong Marso 26 tungod sa deadlock sa negosasyon para sa CBA. Ginaduso sa LFA sa CBA ang pagpataas sa sweldo, alawans, ug pagpatangtang sa pugos nga pagretiro human ang 20 ka tuig nga serbisyo sa mga magtutudlo.

Gawas sa UST ug LPU, kasamtangan usab nga nagalarga ang negosasyon sa mga unyon sa mga magtutdlo sa Siliman University ug Centro Escolar University.

Samtang, napaatras sa mga empleyado sa Benguet State University (BSU) nga nakapailalum sa sistemang Job Order (JO) ug Contract of Service (COS) ang usa ka dili makatarunganong kasabutan nga ginapugos kanila sa administrasyon. Niadtong Marso 24, gipugos sa BSU ang mga JO/COS nga magpailalum sa kasabutan nga nagsulting makadawat lamang sila og sweldo sa panahon nga adunay igong pondo ang unibersidad.

Sa wala pa ang kontrobersyal nga kontrata, kanunay nang natanggong ang sweldo sa mga kontrakwal. Matud sa mga taho, wala pa nila nadawat ang sweldo alang sa Pebrero samtang adunay pipila nga wala pa nakadawat sa sweldo alang sa Enero.

Sa pagkabutyag sa ilang kahimtang sa publiko, napugos ang BSU nga magpagula og pamahayag ug pagpatin-aw mahitungod dinhi. Nagpalusot ang administrasyon sa unibersidad nga kulang ang kasamtangang pondo apan sigurado kunong mabayaran nila ang mga JO/COS.

Sa maong pagsukol ug pakigbisog sa mga magtutudlo, nagpadayag sa tibuok nga suporta kanila ang Alliance of Concerned Teachers ug mga balangay niini.