Pakighiusa sa Marawi sa katawhang Palestino. Kapin-kun-kulang 800 ka residente sa Marawi City ang naglunsad og “solidarity run” sa “Ground Zero” sa syudad niadtong Marso 27 isip pakighiusa sa katawhang Palestino human gibasura sa Israel ang hunong-buto ug subling gibomba ang Gaza. Milanog ang singgit sa mga nagtiniil nga mga partesepante alang sa “Free Palestine” ug “From the river to the sea, Palestine will be free” sa kanhing malipayong komunidad. Hangtud karon, wala pa gihapon nakabalik ang mga residente sa Ground Zero nga walay-hunong nga ginabomba sa rehimeng Duterte niadtong 2017.

Taas-singil sa LRT. Nagtapok ang mga mamumuo, estudyante ug kabus sa Monumento LRT-1 Station usa ka adlaw ayha hingpit nga gipataas ang pamasahe niini niadtong Abril 2. Gibatikos nila ang pagdumili sa rehimeng Marcos nga ipahunong ang pagpataas sa pamiliti ug wad-ag kapuslanan ang kontrata sa estado sa pribadong kumpanyang nagpadagan sa serbisyo. Lakip sa mga mibabag ang mga mananakay gikan sa Camanava nga adunay dakung populasyon sa katawhan ug mamumuo nga nagagamit sa serbisyo sa LRT.

Taas-singil sa tubig. Nagtapok niadtong Abril 1 ang mga myembro sa Bayan Muna atubangan sa upisina sa MWSS Regulatory Office sa Quezon City aron kundenahon ang taas-singil sa tubig karong bulan ug ipanawagan ang #NoToWaterRateHike. Planong ipataas ang singil sa tubig og ₱4-₱5 kada metriko kubiko human gitugutan sa MWSS.

Taas-presyo sa mga produktong petrolyo. Nagprotesta atubangan sa gasolinahan sa Petron ang mga myembro sa Bayan Muna niadtong Marso 30 batok sa ₱1.40/litro nga pagtaas sa presyo sa lana nga gipatuman niadtong Marso 31. Niining adlawa, gipadala sa Bayan Muna ang sulat sa Department of Energy aron singilon ang departamento sa kawalay aksyon niini aron ipatuman ang kamanduan sa Korte Suprema niadtong 2024 para sa “unbundling” sa presyo o pag-obliga sa mga kumpanya sa lana nga ang i-aytimays ang presyo sa mga produktong petrolyo ug ipakita ang detalye sa pagpataas niini.