Gatusan ka libong katawhang Amerikano, mayorya mga mamumuo, ang midagsang sa mga kalsada ug parke niadtong Abril 5 sa dili moubos sa 50 ka estado sa US aron kundenahon ang klase-klaseng kontra-katawhang mga palisiya ni Donald Trump ug sa iyang bilyunaryong tigtambag nga si Elon Musk. Gibanabanang mikabat sa 250,000 ang misalmot sa 1,200 ka protesta ug panagtapok sa tibuok nasud.

Gitawag ang mga aksyon isip protestang “Hands Off!” (o Ayaw mig hilabti!). Panawagan nila nga ihunong nilang Trump ug Musk ang mga atake sa ilang mga trabaho, katungod ug kaayuhan. Usa sa pinakadakung panagtapok makita sa National Mall sa Washington DC, duul sa White House, upisyal nga puy-anan ug upisina sa presidente.

Giorganisa ang mga protesta sa kapin 150 ka grupo, lakip ang mga organisasyon sa katungod sibil, mga unyonsa mamumuo, mga tigpanalipud sa LGBTQ+, mga beterano, ug mga aktibista sa eleksyon. Ang mga partesepante nagpadayag sa pagkadismaya sa mga pagsulay ni Trump nga pagamayon ang gubyernong pederal, pagsisante sa kapin 200,000 ka trabaho sa gubyerno ug dinagkung pagkibhang sa mga katilingbanong benepisyo.

Gipamahayag usab sa mga nagprotesta ang ilang kasilag sa mga palisiya ni Trump sama sa malukpanong deportasyon sa mga imigrante, pagkibhang sa pondo alang sa edukasyon ug panglawas, ug pagtangtang sa mga proteksyon alang sa LGBTQ+. Hugot nilang gikundena ang papel ni Musk, ang pinakadakung oligarko sa kalibutan, sa Department of Government Efficiency, nga nagpatuman sa pagsisante sa dili moubos sa 30,000 ka empleyado sa gubyerno.

Nasalamin sa mga protestang “Hands Off” ang grabe ug lapad nga kasuko sa nagkadaghang Amerikano kang Trump, tulo ka bulan pa lamang sukad nga makalingkod siya sa White House sa ikaduhang higayon. Naglunsad usab og mga protesta ang mga Amerikano nga anaa sa gawas sa US, sama sa France, Germany, United Kingdom ug Portugal.