Naglunsad og lain-laing mga aktibidad ang mga organisasyon nga kabahin sa National Democratic Front (NDF) sa mga syudad ug sentrong lungsod isip pagsaulog sa ika-56 nga anibersaryo sa Bagong Hukbong Bayan (BHB) niadtong Marso 29. Gihatagan nila og pagdayeg ang mga Pulang manggugubat ug kumander sa BHB tungod sa ilang dili matay-og nga rebolusyonaryong diwa sa pagpadayon sa armadong pakigbisog sa kabukiran.

Sa Maynila, nag-organisa og raling pinakilab ang kapin 60 ka myembro sa Kabataang Makabayan (KM) sa Earnshaw Avenue, Sampaloc niadtong Marso 31. Bitbit sa mga myembro sa KM ang mga litrato nila Kaubang Jose Maria Sison, Kaubang Benito Tiamzon ug Kaubang Wilma Austria-Tiamzon. Giparangalan nila ang tulo, ug daghan pang uban, nga nagbuhis sa ilang kinabuhi ug naghalad og panahon alang sa pagpaasdang sa rebolusyong Pilipino.

Niadtong Marso 30, usa ka martsa ang gipahigayon sa KM, Liga ng Agham para sa Bayan, Katipunan ng mga Gurong Makabayan, Revolutionary Organization of Lumads, Cordillera People’s Democratic Front, ug Katipunan ng mga Samahang Manggagawa sulod sa University of the Philippines-Diliman sa Quezon City.

Aduna usay mubo nga programa ang KM-Kira Mindoro sulod sa Polytechnic University of the Philippines (PUP)-Manila niadtong Marso 29. Bitbit nila ang usa ka dakung balatengga, ug mga bandira sa Partido, BHB ug sa NDF nga ilang gisab-it sa ika-upat ug ika-lima nga andana sa bilding sa kampus human sa programa.

Daghan usab nga operasyon-dikit ug operasyon-pinta ang gilunsad sa mga rebolusyonaryong organisasyon alang sa anibersaryo. Nakita ang mga pinta, poster, istiker ug uban pang obra sa KM sa PUP-Manila, De La Salle University-Manila, College of Saint Benilde ug Rizal Avenue sa Maynila.

Nagpinta usab ug nagsab-it og mga poster ang Christians for National Liberation sa kalsada sa Aurora Boulevard Extension sa Quezon City. Gipahigayon usab sa KM-SMR ang pag-post og mga pamahayag ug istiker sa mga unibersidad sa rehiyon sa Davao, balwarte sa mga Duterte.

Nagpagawas usab og pamahayag ang lain-laing rehiyonal nga balangay sa NDF ug mga organisasyon ilalum niini aron saulugon ang anibersaryo sa BHB. Ingonman, nagpadala og mga pagtimbaya sa anibersaryo ang pipila ka internasyunal nga mga partido ug organisasyon lakip ang Friends of the Filipino People in Struggle, Cairde na Filipínigh Committee sa Anti-Imperialist Action Ireland ug Communist Party of Australia (Marxist-Leninist).