Wala nalipay ang liderato sa Moro Islamic Liberation Front (MILF) sa pagpili ni Ferdinand Marcos Jr kang Abdulraof Macacua isip bag-ong temporaryong punong ministro sa Bangsamoro Transition Authority (BTA). Matud sa pamahayag nga gipagula sa Komite Sentral niini, walay gihimong konsultasyon si Marcos ug sukwahi kini sa rekomendasyong ipabilin ang kasamtangang punong ministro nga si Ahod Ebrahim (Al Haj Murad). Mas suud sa rehimeng Marcos si Macacua, nga usa usab ka lider sa MILF.

Sa mando ni Marcos, gituboy si Murad isip usa na lamang sa 80 ka representate sa rehiyon, butang nga wala niya gidawat. Gibutang si Murad sa BTA niadtong 2019 sa kanhing presidente nga Rodrigo Duterte. Siya ang kasamtangang lider sa MILF ug commander-in-chief sa Bangsamoro Islamic Armed Forces, ang armadong pwersa sa MILF.

Lapas sa pinal nga kasabutan pangkalinaw nga isinabatas isip Bangsamoro Organic Law (BOL) ang dayag nga interbensyon sa rehimeng Marcos sa internal nga proseso sa MILF. Giyatakan niini ang mga probisyon kung asa nakasulat ang “prinsipyo sa awtonomiya” sa grupo. Nabalaud kini sa panahon pa sa rehimeng Aquino, apan hangtud karon wala pa kini hingpit nga napatuman tungod kay wala pa nalunsad ang unang eleksyon alang sa pagtukod og awtonomiyang gubyernong Bangsamoro.

Lapas usab sa BOL ang pagpili ni Marcos sa 34 lamang sa 41 nga ginsakpan sa MILF sa BTA. Nakasulat sa BOL nga ang BTA pagapangulohan nag-una sa MILF, sekundaryo sa mga pwersa sa Moro National Liberation Front ug ulahi sa ikatulo ang dili-Moro nga mga nasudnong minorya. Nawala ang mayoryang pusisyon sa MILF dihang gipulihan ni Marcos ang 70 ka ginsakpan niini niadtong Marso 3.

Sa interbensyon sa rehimen sa BTA, gipahuyang ni Marcos ang kredibilidad sa liderato sa MILF. Sa pagtalikod ug pagbalewala niini sa mga rekomendasyon sa MILF, epektibong gihikawan ni Marcos og katungod ang MILF nga pangulohan ang BTA maoy nagdumala karon sa BARMM. Ginaguba usab niini ang pagsalig sa katawhang Moro sa proseso sa kalinaw.

Sa pagbalewala sa Gubyerno sa Pilipinas sa mga probisyon sa BOL, gipakita niini kabakakon ilabina sa rehimeng Marcos, sa mga kasabutan nga gisulod niini atol sa panaghisgot kalinaw.