Sulod sa Bagong Hukbong Bayan (BHB), nagkalain-lain ang mga propesyon nga natun-an sa mga Pulang manggugubat. Sa pagpaasdang sa gubat, nagsilbi usab silang mga titser, abugado, artista, mang-aawit, nars o doktor ug uban pang mga trabaho, tanan alang sa interes sa masang dinaugdaug.

Kini ang natun-an ni Kasamang Sey, usa ka batan-ong manggugubat nga kasamtangang nagalihok sa rehiyon sa Bicol. Sukad pagkabata, pangandoy na niyang mahimong doktor apan sayod siya nga dili kaya sa iyang mga ginikanan nga pag-eskwelahon siya sa medisina.

“Sarang ba ang duha ka ektaryang yuta sa lima ka managsuon nga sa kalisud sa kinabuhi ug halos walay madawdaw?” matud niya. Sayod si Ka Sey nga “milyones” ang gikinahanglan aron makatungha ug makagradwar sa burges nga eskwelahan. Literal nga “nakatungtong” ra siya sa kolehiyo tungod kay dili makaya sa iyang gamay nga sweldo isip “working student” ang mga gasto sa eskwelahan.

Dili na bag-o kang Ka Sey ang rebolusyonaryong kalihukan. Aktibong mga myembro sa Partido sa lokalidad ang iyang mga ginikanan. Nagdaku siya nga kanunay nilang nahimamat ang mga kauban.

“Naagni” siya sa BHB, hinungdan sa iyang pagsampa sa hukbong bayan. “Lahi gyud ang dating sa NPA sa akoa. Sa matag higayon nga moadto ko sa ila ug kung mobalik na ko sa balay, murag naay kulang sa akoa,” matud niya. “Murag love at first sight.”

Sulod sa hukbo, hinay-hinay niyang napalalum ang iyang pagsabot sa mga butang-butang. Kauban ang sama niyang manggugubat, gitun-an niya ang katilingban ug rebolusyon, ug nangahas nga ipraktika ang mga natun-an.

“Apan ang pinaka-eksayting, dinhi pwede diay nako ipadayon ang akong pangandoy—ang mahimong doktor!” ingon ni Ka Sey.

Bag-o lang, migradwar siya, kauban ang 11 pa gikan sa lain-laing yunit sa BHB-Bicol, sa pagbansay medikal nga gipahigayon sa usa ka natarang gerilya sa Norben Gruta Command. Daku kini nga kalampusan sa pagpadayon sa rebolusyonaryong buluhaton. Giandam niini ang mga Pulang manggugubat aron maghatag og libreng serbisyong medikal sa masang mag-uuma.

Sa iyang paggradwar, nahimong hingpit nga kombat medik si Ka Sey.