Labaw nga gipagrabe karon sa imperyalismong US ang imperyalistang panagbangi sa tibuok kalibutan. Gideklara bag-o lang sa imperyalistang gubyerno sa US ang gitawag niini og “deterrence strategy” o “estratehiya sa pagpakgang” sa “agresyon sa China” sa South China Sea, aron kuno “kab-oton ang kalinaw pinaagi sa kusog” ug “likayan ang gubat.”

Gideklara kini ni Defense Sec. Pete Hegseth sa US dihang mibisita siya sa Pilipinas niadtong ulahing semana sa Marso. Dili mapugngan ang pagkiwakiw sa igog ni Marcos ug sa mga itoy nga upisyal sa pagpanguna ni Defense Sec. Gilbert Teodoro, nga nagtanyag sa US nga gamiton ang nasud alang sa estratehiya niini. Kini human silang gisaaran nga ipadayon ang planong paghatag og $500 milyong ayudang militar.

Human sa pipila ka adlaw, sa mando sa US, gianunsyo ni Gen. Romeo Brawner, hepe sa Armed Forces of the Philippines (AFP), nga palapdon ang langkub sa operasyon sa AFP sa lapas pa sa ulahing isla sa Mavulis sa Batanes. Gimanduan niya ang Northern Luzon Command nga mangandam kung adunay “pagpanulong sa Taiwan.” Ang tinuod, gusto sa US nga ipwesto didto ang mas daghang sundalong Pilipino aron magsilbing alalay sa mga tropang Amerikano nga planong ipwesto duul sa Taiwan.

Kinahanglang kusganong isalikway ug batukan sa katawhang Pilipino ang pagpagamit sa rehimeng Marcos sa estratehiya sa imperyalismong US ug pagguyod sa Pilipinas sa mga operasyong militar sa US. Wala kini laing iresulta gawas sa pagdeploy sa nagkadaghang tropa, barkong nabal ug himang iggugubat sa US sa Pilipinas, sama sa ginahimo niini sa Japan, South Korea ug uban pa. Nakapukos kini sa pagpakusog sa pagpangandam ug pagpanghulhog sa US og gubat sa Asia-Pacific, subay sa estratehikong laraw niining “pugngan” ang pagkusog sa gahum sa karibal niining China.

Ang pagduso sa US ng estratehiya niini nagayatak sa kaugalingnan sa Pilipinas. Ginagapos niini ang Pilipinas sa mga plano sa US ug gihikawan ang nasud sa kapasidad nga maghimo og kaugalingong paghukum sa mga isyung panggawas. Sa pagpabor ni Marcos sa mga planong militar sa US, iyang gisirad-an ang lain-laing posibleng dalan, ilabina ang malinawon ug diplomatikong dalan, sa pag-atubang sa China aron sulbaron ang mga panagbangi alang sa mutwal nga kaayuhan. Sa kaalautan sa kinabuhi sa gatusan ka libong Pilipino, nagpagamit karon si Marcos ug ang AFP sa US sa plano niining painiton ang sitwasyon sa Taiwan sa pagsulay nga hagiton ang China nga maghimo og agresibong lakang militar.

Gipasagdan ni Marcos nga labawng pahugton sa US ang kontrol sa AFP pinaagi sa joint trainings aron moabag sa mga tropang Amerikano ug magsalig na lang sa mga suplay gikan sa militar sa US. Ginapagawas nilang “kaabag” sila sa AFP, bisan og ang kamatuuran, ginagamit lamang sa US ang AFP isip mga pyesa sa estratehiya niining ipahamtang ang hegemonya o gahum sa Asia.

Ang “estratehiya sa pagpakgang” sa US takuban lamang aron hatagag rason ang pagdeploy og mga tropang militar niini sa lain-lain bahin sa kalibutan. Imbes nga pugngan, labaw lamang niining ginataas ang posibilidad nga moulbo ang gubat. Ginapakita sa kasaysayan nga ang pipila ka tuig nga agresibong pagdeploy sa US sa mga pwersang militar ug mga himang iggugubat sa sidlakang bahin sa Ukraine, sa ngalan sa pagpakgang sa ekspansyunismo sa Russia, misangpot sa gubat niadtong 2022.

Labaw lamang niining ginatukmod ang kumpetisyon sa armas, kung asa nagkadakung rekurso sa publiko ang giusik-usikan sa pagpalambo ug produksyon sa mga armas, imbes nga igahin sa mga gikinahanglang katilingbanong serbisyo.

Ang palisiyang “pagpakgang” sa US nagsubay sa ginatawag niining Indo-Pacific Strategy aron palibutan ang China pinaagi sa pagdeploy og pwersang militar, partikular na sa mga kadagatan sa sidlakang bahin niini. Ang ingon niining estratehiya labaw lamang mosangpot sa nagkagrabeng tensyong militar sa South China Sea ug sa laing bahin sa rehiyon, dungan sa paningkamot sa China nga tugbangan ang mga aksyon sa US pinaagi sa pagdeplot sa kaugalingon niining mga pwersang nabal ug pangkadagatan. Midaku ang posibilidad sa sayop nga kalkulasyon nga mamahimong mosangpot sa pag-ulbo sa gubat.

Ginagamit sa US ang Pilipinas isip usa ka dakung base militar alang sa forward-deployment o abanteng pagpwesto sa mga opensibong armas. Niadtong milabayng tuig, gipwesto sa US ang Typhon missile system sa amihanang Luzon. Wala nasayod ang publiko nga gibalhin kini sa laing lokasyon, ug gikabalak-ang anaa sa usa ka isla sa Batanes. Sa umalabot nga Balikatan war exercises, nga nakatakdang salmutan sa mokabat 10,000 ka tropang Amerikano, planong ipwesto sa US ang NMESIS (Navy Marine Expeditionary Ship Interdiction System), usa ka kontra-barkong missile system, nga kayang magpalupad og misayl sa gilay-ong 185 kilometro. Plano usab nga dalhon ug gamiton sa US Navy sa Pilipinas ang mga “unmanned surface vehicle.”

Kung toohan ang mga pamahayag ni Hegseth, nakatakdang pakusgon sa US ilalum sa gubyernong Trump ang pukos niini sa Asia, lakip sa Middle East, ug ibalhin dinhi ang nagkadaghang pwersa gikan sa Europe. Usa kini sa hinungdan kung nganong gusto nang tapuson ni Trump ang gubat sa Ukraine aron dili na kini mahikot didto.

Atubangan sa maong sitwasyon, kinahanglang hugot nga maghiusa ang katawhang Pilipino ug kusganong ipabati ang patriyotikong singgit aron molingkawas gikan sa kontrol militar sa US. Ang maong kontrol militar anaa sa porma sa presensya sa liboan ka mga tropang Amerikano sa mga base militar niini sa Pilipinas, paggamit sa nasud alang sa paglunsad og sunud-sunod ug walay gintang nga mga pagbansay sa gubat, pagpwesto og mga himang iggugubat sa mga EDCA site, paghatag og ayudang militar sa kampanya sa pagpamomba ug pagpangistraping sa AFP batok sa BHB ug sa masang mag-uuma, ug pagdikta sa “AFP modernization” nga nag-obliga sa AFP nga sa US lamang mopalit og mga hinagiban, hinungdan nga labaw kining nakahikot ug nakasandig sa US.

Kinahanglang kusganong magprotesta ang katawhang Pilipino batok sa planong Balikatan war games, nga labawng mag-among sa nasud sa imperyalistang panagbangi tali sa US ug China. Kinahanglang ipanghingusog ang pangayo alang sa demilitarisasyon sa South China Sea, ug ang pagresolba sa mga bangi sa kadagatan pinaagi sa malinawong dayalogo. Kinahanglang mobarog ang katawhan alang sa hinanali nga paghawa sa mga base militar, pagpalayas sa tanang tropang Amerikano, pagbasura sa Enhanced Defense Cooperation Agreement (EDCA) ug tanang dili patas nga tratadong militar, ug pagtapos sa ayudang militar sa mapanumpuon ug pasistang rehimeng Marcos.