Milihok ang masang Mindoreño sa duha ka magkabulag nga higayon aron suklan ang pagpanggun-ob sa kinaiyahan ug aron panalipdan ang ilang panginabuhian.

Niadtong Marso 23, nagtapok ang mga residente sa Barangay Talabaan, Mamburao, Occidental Mindoro alang sa usa ka prayer rally batok sa magun-ubon ug malinglahong operasyong dredging sa PERRC Construction and Development Corporation.

Matud sa Mindoro Forum Network (MFN), gisugdan sa kumpanya ang dredging sa takuban sa “river restoration” sa Ilog ng Pagbahan. Bisan pa man, wala kini nagkalot sa gitakdang lugar sa bukana sa suba. Hinunua, nagkalot kini sa kadagatan nga pipila ka kilometro gikan sa baybay sa barangay. Tungod dinhi, dili na makapanagat ang mga mangingisda. Wala na silay gakasikop tungod kay gakaabog ang mga isda sa kasaba tungod sa halos 18 ka oras nga pagkalot sa barko niini.

Niadtong Pebrero 25, temporaryong gipahunong sa lokal nga gubyerno sa Mamburao ang dredging sa kumpanya human makadawat og mga reklamo gikan sa mga residente sa Barangay Talabaan. Sa ilang protesta, panawagan nila nga permanente nang ipahunong ang operasyon sa kumpanya ug ipreserba ang kadagatan, ilabina ang mga bahura dinhi. Nanawagan usab sila sa gubyerno nga panalipdan ang mga mangingisda ug ilang panginabuhian.

Samtang, hiniusang nag-ugbok og kandila ang mga myembro sa Samahan ng mga Magsasaka sa Guinobatan (SMG) ug MFN atubangan sa city hall sa Calapan City, Oriental Mindoro niadtong gabii sa Marso 28 aron manawagan sa lokal nga gubyerno nga pugngan ang pagkural sa usa ka korporasyon sa Barangay Guinobatan. Usa ka adlaw ayha niini, miabot ang ginsakpan sa MENAKOR Corporation ug pugos nga nagtukod og koral pinaagi sa permit nga gihatag sa barangay. Ginaangkon sa MENAKOR, nga gipanag-iyahan ni Jolly Lim Ting, ang 158 ka ektaryang yuta sa barangay.

Matud sa mga residente, walay gihimong konsultasyon kanila ang barangay. Grabeng maapektuhan sa pagkoral ang mga yuta, panginabuhian ug puluy-anan sa mga residenteng pipila ka henerasyon nang nanimuyo ug nagtrabaho dinhi.

Matud sa SMG, 1998 pa dihang gisugdan sa paghatag sa Department of Agrarian Reform (DAR) sa mga mag-uuma sa Guinobatan ang Certificate of Land Ownership Award o CLOA. Apan hangtud karon, padayon nga nag-atubang sa pagpangilog og yuta ang mga mag-uuma. Gibanabanang 600 ka pamilya ang mapalayas sa maong pagpangilog.