Gisugat og protesta sa mga progresibong grupo ang pagbisita sa Pilipinas sa bag-ong kalihim sa depensa sa US nga si Peter Hegseth niadtong Marso 28. Anaa sa nasud si Hegseth hangtud niadtong Marso 29, aron tigumon ang mga upisyal sa depensa ug militar sa Pilipinas aron iduso ang adyenda sa gubat sa US sa Pilipinas ug sa Asia.

Usa sa adyenda ni Hegseth ang pagtipun-og sa mga gamit-militar sa US sa nasud, subay sa ekstratehikong laraw niining liyukan ang China gamit ang first-island chain. Human ipwesto ang Typhon Missile System sa amihanang Pilipinas, plano usab sa US nga ipwesto sa nasud ang NMESIS (Navy Marine Expeditionary Ship Interdiction System).

Ang NMESIS usa ka sistema sa misayl nga anti-ship o mobungkag sa barko. Gikarga kini sa usa ka unmanned ground vehicle (dakung trak) nga ginatawag og ROGUE Fires Carrier ug may kargang Naval Strike Missile (NSM). Ang mga NSM mga misayl nga pwedeng molupad og hangtud 185 kilometro nga mga “stealth feature” aron dili kini madiskubre. Ang maong sistema ginagamit sa US Marine Corps alang sa nilagyo nga mga atake batok sa mga barko gikan sa yuta.

Kadungan sa NMESIS, magdeploy ang US og mga unmanned surface vessel nga pagagamiton niini sa South China Sea. Sagad gagmay ug portable ang maong mga pangdagat nga “drone” ug nakadisenyo alang sa dautang panahon sa kadagatan ug piot nga agianan sa tubig. Kargado kini sa mga sensor, kamera, sistemang ISR ug sonar. Mamahimo kining direkta o dili direktang kontrolon sa tao. Ginagamit kini alang sa pagpaniktik, sarbeylans, rekorida ug pagdirehe sa trapik sa dagat.

Ang maong mga gamit pagakontrolon sa gitukod nga Littoral Rotational Force-Luzon sa 3rd Marine Littoral Regiment sa US. Sama sa mga naunang “rotational force,” mamahimong permanente ang presensya niini sa kadagatan ug mga baybay sa Pilipinas, sukwahi sa reaksyunaryong konstitusyon nga nagabawal sa presensya sa mga langyawng tropa. “Ipa-ila-ila” ang maong permanenteng pwersang sa umalabot nga Balikatan 2025, kung asa manguna kini sa pagahimuong “full battle test” kung asa pagagamiton sa US ang Pilipinas isip lunsaranan niini sa gubat batok sa China.