Aregluhan sa bahinay sa pork barrel sa badyet 2026 ang nasaksihan sa katawhan sa gipahigayong bicameral conference committee (bicam) sa Senado ug kongreso. Bisan og naka-livestream, wala gitago sa mga magbabalaod ang ilang panagbangi sa bisan unsang porma sa pork barrel ug pila ang mabilin sa badyet. Gipinal sa bicam ang puno sa pork barrel nga badyet niadtong Disyembre 18.

Kunuhay gikibhangan sa Senado ang badyet sa Department of Public Works and Highways og ₱45 bilyon tungod sa overpricing apan gibalik sa bicam ang kapin katunga sa pondo. Sa ingon, nagpabilin sa badyet ang bulto sa pondong “allocable” ug “non-allocable” kung asa nagakuha ang presidente, mga kongresista ug senador sa tagsa-tagsa nilang kikbak.

Lain pang giareglo sa bicam ang pagdugang og pondo alang sa Medical Assistance for Indigent and Financially Incapacitated Patients, pork barrel sa mga kongresista sa porma sa “serbisyong panglawas.” Gipatas-an pa sa bicam ang alokasyon gikan sa orihinal nga ₱49.2 bilyon ngadto sa ₱51.64 bilyon, pondong angay untang idugang sa badyet sa mga pangpublikong ospital.

Giareglo usab sa bicam ang “LGU pork” o Local Government Support Fund nga halos gidoble sa Senado gikan ₱20.2 bilyong ngadto sa ₱38.1 biiyon. Gikibhangan sa Senado ang pondo alang sa mga benepisyo ug bonus sa mga empleyado aron paburuton ang pondong ayuda nga gunit sa mga lokal nga upisyal.

Kini nga mga alokasyong dugang sa nauna nang nauyunang pondong gunit sa mga magbabalaod sa porma sa ayuda. Gipatas-an pa sa bicam ang ayudang Assistance to Individuals in Crisis Situations gikan sa orihinal nga ₱27 bilyon ngadto sa ₱63 bilyon.

Napabilin usab ang pork barrel ni Marcos nga ₱243.4 bilyon alang sa unprogrammed appropriation (nga nabantog nga gigamit sa puno sa anomalyang flood control project) ug ₱10.77 bilyong confidential and intelligence fund. Wala usab natandog ang ₱8-bilyong pork barrel sa pasistang ahensyang NTF-Elcac.