Aregluhay han bahinay han pork barrel ha 2026 nga badyet an nabuksas ha katawhan ha ginhimo nga bicameral conference committee (bicam) han Senado ngan Uruubos nga Kapunungan. Bisan kun naka-livestream, waray mahitago han mga magbaralaud an ira aragway ha kun anu-ano nga porma han pork barrel ngan tagpira an masasalin ha badyet. Ginpinal han bicam an tadtad-ha-pork barrel nga badyet hadton Disyembre 18.

Kunuhay gin-ibanan han Senado an badyet han Department of Public Works and Highways hin ₱45 kabilyon tungod ha overpricing kundi ginbalik liwat ha bicam an masobra katunga han pondo. Ha sugad, nagpapabilin ha badyet an kadak-an han pondo nga “allocable” ngan “non-allocable” diin nakuha an presidente, mga kongresista ngan senador han kada tagsa nira nga kikbak.

Isa pa nga gin-areglo ha bicam an pagdugang han pondo para ha Medical Assistance for Indigent and Financially Incapacitated Patients, pork barrel han mga kongresista ha porma han “serbisyo nga pankalibsugan.” Ginpahitaas pa han bicam an alokasyon tikang ha orihinal nga ₱49.2 kabilyon ngadto ha ₱51.64 kabilyon, pondo nga kinahanglan unta gindugang ha badyet han mga pampubliko nga ospital.

Gin-aareglo liwat ha bicam an “LGU pork” o Local Government Support Fund nga haros gindoble han Senado tikang ha ₱20.2 kabilyon ngadto ha ₱38.1 kabilyon. Gin-ibanan han Senado an pondo para ha mga benepisyo ngan bonus han mga empleyado para padakuon an pondo nga ayuda nga katin han mga lokal nga upisyal.

Ini nga mga alokasyon dugang ha nahiuna na nga ginkasarabutan nga pondo nga katin han mga magbaralaud ha porma han ayuda. Ginpahitaas pa han bicam an ayuda nga Assistance to Individuals in Crisis Situations tikang ha orihinal nga ₱27 kabilyon ngadto ha ₱63 kabilyon.

Nagpabilin liwat an pork barrel ni Marcos nga ₱243.4 kabilyon para ha unprogrammed appropriation (nga nahibantog nga gin-gamit ha mga maanomaliya nga flood control project) ngan ₱10.77 kabilyon nga confidential and intelligence fund. Bug-os liwat an ₱8-kabilyon nga pork barrel han pasista nga ahensya nga NTF-Elcac.