Taliwala sa subsub nga operasyong militar, milahutay ang rebolusyonaryong kalihukan sa Negros sa pagpaasdang sa kalihukang pagtul-id. Makanunayon kining naningkamot nga konsolidahon ang Bagong Hukbong Bayan (BHB) ug ang Partido. Naglunsad kini og kolektibong mga pagtuon sa inang-ang nga kurso sa Partido ug mga pagbansay-militar.

Ning bag-o lang, napahigayon sa isla ang intermedyang kurso sa Partido sa “staggered” nga pamaagi. Gitambungan kini sa mga kadre ug upisyal militar. Luwas nga natapos ang tibuok kurso na tumagal ng kinatibuk-ang 54 oras (walo ka oras kada sesyon sa kada adlaw). Unod sa pagtuon ang dugang nga mga prinsipyong giya sa pagpalambo sa gimbuhatong masa ug pagpatuman sa mga rebolusyonaryong gimbuhaton sa gambalay sa kalihukang pagtul-id.

Malampuson usab ang pagtapos sa mga kadre ug upisyal sa BHB sa pagtuon ug pagbansay sa gipamubong kurso sa gimbuhatong paniktik. Milungtad kini og tulo ug tunga ka adlaw lakip na ang praktikum. Ang resulta sa praktikum nahiusahan sa kumand nga himuong upisyal nga plano sa mga pagalunsarong taktikal nga opensiba sa BHB.

“Dugang kahibalo ang maong teoretikal nga pagtuon ug pagbansay sa malampusong gimbuhatong militar ilabina ang paglunsad og taktikal nga opensiba,” matud kang Ka Marco, lider sa platun.

“Angayang mahatagan og hustisya ang mga biktimang mga kauban ug masa sa grabeng pasismo sa kaaway…kinahanglang makasakmit og bala ug armas gikan sa berdugo ug pasistang AFP, PNP ug paramilitar ug ipaarmas sa mga bag-ong rekrut nga Pulang manggugubat,” matud niya.

“Hinog kaayo karon ang kahimtang sa pulitika. Kinahanglang tumanon sa Partido ang iyang papel sa pagpangulo ug himuon sa Hukbo ang sentral nga tahas niini pinaagi sa malampuson nga taktikal nga opensiba dungan sa grabeng kasilag sa katawhang Pilipino sa pagpangawat sa estado sa bahandi sa katawhan,” asoy ni Ka Myra, instruktor sa pulitika.

“Kinahanglang kusog nga bagtingon ang kampana sa rebolusyonaryong kalihukan sa malukpanong opensiba ug naglanog nga buto sa mga armas sa Bagong Hukbong Bayan sa kabanikanhan dungan sa malukpanong protesta sa masa sa mga kalsada sa kalunsuran,” matud niya.