Walay puas ang pagpangilog sa mga langyawng kumpanya ug dagkung burgesyang kumprador sa kinaiyanhong bahandi ug yutang kabilin sa mga lumad ug mag-uuma sa nasud. Gamit ang pulis, militar ug ang mga korte, giyatakan niini ang katungod sa mga mag-uuma sa yuta, ginasumpo ang ilang pakigbisog ug ginagamit ang balaod aron palayason sila sa kaugalingon nilang yuta.

Sa Sityo Marihangin, Barangay Bugsuk, Balabac, Palawan, gikasuhan og “squatting” o iligal nga pagpuyo sa siyam ka mangingilog og yuta ang 282 ka residenteng lumad sa sityo. Lakip sa gikasuhan mga patay na ug mga bata. Niadtong Disyembre 17, misulong sa sityo ang sugo sa korte uban ang mga armadong pulis aron magtunol og TRO o temporary restraining order batok sa mga residente.

Matud sa mando, bawal babagan ang pagsulod sa sityo sa mga mangingilog og yuta sulod sa 20 ka adlaw. Matud sa mga residente, tin-aw nga adunay kalabutan ang maong kaso sa plano sa San Miguel Corporation (SMC) nga ilugon ang ilang yutang kabilin. Pipila ka tuig nang ginapugos sa Bricktree Properties, subsidyaryo sa SMC, nga angkunon ang yuta aron tukuran og 25,000 ektaryang imprastrakturang pangturismo alang sa labing adunahan sa Balabac.

Sa Dupax del Norte, Nueva Vizcaya, duha ka hugna nang gimandoan sa korte ang pagbungkag sa barikada sa mga residente batok sa Woggle Corporation. Niadtong Disyembre 10, malampusong napugngan sa mga residente ug tawong simbahan ang sulayang pagbungkag. Subling miatake ang mga pulis niadtong Disyembre 12 aron bungkagon ang barikada sa mga residente sa Upper Tacbao, Barangay Bitnong. Balos kini sa kumpanya human makaplagang sunog ang excavator niini niadtong adlawa.

Kaabag ang PNP Dupax Del Norte, gihadlok, gipig-ot, ug gibastos nila ang mga nagbarikada ug giguba ang ilang mga gamit. Duha ka babayeng residente ang giharang sa mga ginsakpan niini ug pugos nga gipahubo. Gitiunan usab og pusil sa mga pulis ang mga residente dihang giduso nila ang ilang mga katungod. Gikawat usab ang ilang mga selpon ug ID dihang nagsulay ang mga residente nga idokumento ang pagpanghasi kanila sa mga maton.