Gidumdum sa lain-laing tsapter sa Migrante ang kalibutanong adlaw sa mga migranteng mamumuo niadtong Disyembre 18. Gideklara usab nila kini isip “Zero Remittance Day batok sa korapsyon,” usa ka adlaw nga dungan-dungan nga dili magpadala og kwarta ang mga migrante sa Pilipinas. Porma kini sa protesta sa mga migranteng mamumuo aron irehistro ang ilang pagkundena sa malukpanong korapsyon ug pagpangawat sa tanang nalambigit.

Misalmot sa kampanya ang mga balangay sa Migrante sa Thailand, Hong Kong, Japan, Canada, France, Italy, Australia, South Korea, Germany, Middle East ug USA.

Naglunsad usab og protesta ang pipila ka balangay sa Migrante aron kundenahon ang mga pagpangabuso ug diskriminasyon nga ilang gakasinati isip migranteng mamumuo.

Sa New Zealand, gipanawagan sa Migrante-Aotearoa ang pagtapos sa sistema sa paghikot ng work visa sa migrante sa employer.

Sa US, nagprotesta ang Tanggol Migrante Movement (TMM) sa konsulado sa Pilipinas sa Chicago, California ug Washington aron ipanawagan ang paglingkawas sa mga Pilipinong imigrante nga gidetine sa Immigration and Customs Enforcement (ICE). Gianunsyo usab ang pagtukod sa Families of Filipinos in Detention, organisasyon sa mga pamilya, higala ug sa mga kanhing nadetine sa ICE.

Sa Pilipinas, nagprotesta sa Mendiola ang mga myembro sa Migrante Philippines gikan sa mga balangay niini sa lain-laing prubinsya. Misalmot sa protesta ang Concerned Seafarers of the Philippines, Samahan ng mga DH sa Gitnang Silangan, ug Kilusang Mayo Uno.