Walay katugbang ang pasistang atake sa Operation Kagar sa reaksyunaryong estado sa India batok sa masa ug rebolusyonaryong kalihukang Indian sa milabayng halos duha ka tuig. Atubangan niini, nanglimbasog ang Communist Party of India (Maoist), ang People’s Liberation Guerrilla Army (PLGA), ug tibuok rebolusyonaryong kalihukan sa India nga pakyason ang deklaradong laraw sa Kagar nga tapuson ug pukanon ang pagsukol sa katawhan sa Marso 2026.

Sukad nga gipatuman niadtong Enero 2024 ang Operation Kagar, maisugon kining gisuklan sa PLGA. Taliwala sa daku kaayong pwersang pangdumog ug pangliyok sa rehimeng Modi, pagsulpot sa mga kampo militar ug kampanyang likidasyon sa liderato sa Partido, nakalunsad og mga armadong aksyon ang gerilyang hukbo.

Sa milabayng tuig, mikabat sa 116 ang napatay ug 208 ang nasamdan sa pwersa sa pulis ug sundalo sa mga armadong aksyon sa PLGA. Gitarget usab niini ang lunod-patay nga impormer sa pulis ug militar ug mga panatikong lider sa Bharatiya Janata Party, nagharing partido sa India. Nag-unang nagagamit og mga eksplusibo ang hukbo sa mga operasyon niini. Ug sa pipila ka higayon, nagagamit ang PLGA og mga lumadnong armas sama sa mga lit-ag nga suyak.

Bisan pa man, matinud-anong gihikyad sa CPI (Maoist) nga nakasinati kini og grabeng pagkapildi sa milabayng tuig. Matud niini, bunga ang mga kapildihan sa internal nga mga kahuyangan, kapakyasang ipatuman ang mga plano sa Komite Sentral ug sa gipagrabeng atake sa estado.

Gikan Disyembre 2024 hangtud Nobyembre niining tuiga, mikabat sa 320 ka mga rebolusyonaryo ang namartir diin 117 mga babaye. Dili moubos sa 237 kanila myembro sa Partido. Walo anaa sa ang-ang Komite Sentral, lakip ang kinatibuk-ang kalihim sa Partido nga si Kasamang Basavaraju, 15 ang ang-ang komite sa estado, 25 ang ang-ang distrito, ug 73 ang ang-ang komite sa erya. Adunay 13 gikan sa PLGA ug 33 ka mga kadre ug aktibista sa organisasyong masa.

Aron molagsik balik, nanawagan ang CPI (Maoist) nga pakusgon ang pagsukol sa Operation Kagar sa tibuok nasud. Giduso sa Partido nga puntingon ug tul-iron ang nahimong mga kasaypanan sa milabayng 22 ka bulan aron mapugngan ang labaw pang mga kapildihan. Angayan usab kunong tun-an ug tukion ang obhetibong kahimtang ug suhetibong pwersa sa matag erya aron subling palagsikon ang Partido, makonsolida ang PLGA ug ang mga organisasyong masa.

Isa sa mga naunang natukoy sa Partido nga kasaypanan niini, ilabina sa gubat sa katawhan, mao ang pagpasigpit sa kaugalingon pinaagi sa pagpagamay sa eryang nalihukan. Matud niini, kinahanglang molihok sa mas lapad nga langkub ang hukbo ug dili magpabiling sentralisado. Partikular nga pananglitan niini ang kapakyasang magbalhin og tropa sa PLGA gikan sa rehiyong Dandakaranya, nga episentro sa Operation Kagar, ngadto sa ubang rehiyon.

Gawas dinhi, gihikyad usab sa Partido ang panginahanglang ibutyag, isalikway ug batukan ang mga traydor sa rebolusyon. Pinakabantog sa maong mga traydor silang Sonu (Mallojula Venugopal Rao), kanhing myembro sa Kawanihan sa Pulitika sa CPI (Maoist), ug Satish (Takkallapalli Vasudeva Rao) nga aktibo na karong nagpagamit sa rehimeng Modi. Misurender sila niadtong Oktubre, ug nag-aghat sa uban pa niadtong Nobyembre. Mikabat sa 299 ka indibidwal ang nadala sa pundok ug nagsurender sa dili moubos sa 277 ka armas sa PLGA ug Partido.

“Niining panahona, tahas natong langkaton ang kahadlok ug kahigwaos sa atong han-ay, magpakita sa kaisog ug pakusgon ang kumpyansa sa atong Partido,” matud sa CPI (Maoist). Dugang niini, sa grabeng krisis sa nasud, labawng nagkatin-aw karon ang panginahanglan nga pangulohan sa Partido ang kinatibuk-ang makihut-ong nga pakigbisog sa masang Indian aron ibagsak ang paghari sa mga imperyalista, dagkung kumprador, ug mga agalong yutaan.

Pagpakita sa determinasyong moabante ang pagdiriwang sa rebolusyonaryong kalihukan sa India sa ika-25 anibersaryo sa PLGA niadtong Disyembre 2. Sa Semana sa Pagsaulog gikan Disyembre 2-8, gilunsad sa lasang, kapatagan, ug sentrong urban, ang mga tigum sa grupo ug gagmayng panagtapok. Nagsab-it ug nag-apud-apud ang mga rebolusyonaryo og mga poster ug polyeto aron ipanawagan ang pagpakusog ug pagsalmot sa PLGA. Gilunsad kini nga may hugot nga pag-amping ug pagprayoridad sa seguridad tungod sa gipagrabeng atake sa estado.