Mitataw niining mga milabayng bulan ang malukpanong partisipasyon ug pagsalmot sa mga tawong-simbahan, lider-relihiyoso ug layko sa mga demonstrasyon batok sa grabeng korapsyon sa rehimeng Marcos. Bisan og nagpabiling konserbatibo ang Simbahan, ang tingog ug pagparog niini ang usa sa nakaaghat sa liboang misalmot sa protesta sa katawhan kontra-korapsyon.

Sa tunga niini ang rebolusyonaryong pakiglambigit sa mga myembro sa Christians for National Liberation (CNL) nga maoy ubod sa pakigbisog sa katawhang Kristyano. Lakip kini sa mga gipaambit nilang Ka Lila ug Ka Mingol, mga bag-ong napili nga upisyal sa CNL, sa pakighinabi sa Ang Bayan.

Daku ang impluwensya sa Simbahan ug uban pang relihiyosong grupo sa usa ka nasud sama sa Pilipinas nga mayorya mga Katoliko, pagpaambit ni Ka Mingol.

“Ginaila silang tigsangyaw sa hustisya ug kamatuuran,” matud niya. Makaengganyo sa mga pamilya ug komunidad ang pagsalmot sa simbahan ug relihiyoso sa mga lihok protesta tungod kay sumbanan sila sa moral legitimacy o pagkahusto, sa mata sa kadaghanan.

Matud usab ni Ka Lila, ginatudlo sa mga tawong-simbahan ug debuto ang pakigsimpatiya sa katawhan, ang pagkamatinud-anon sa pagtabang sa matag usa, molihok para sa kamatuuran ug kaligdong ilabina atubangan sa grabeng kalisud ug katalagman. “Dili makatarunganon ang sistematikong pagpangawat sa rekursong angay igahin sa mga labing nanginahanglan,” matud niya.

Apan niadtong Nobyembre 30, mitataw ang managlahing barog sa Simbahan sa panawagan sa katawhan. Nakita kini sa nahimong lihok sa Iglesia ni Cristo ug mga lider sa Catholic Bishop’s Conference of the Philippines. Niining mga higayuna, nanawagan ang CNL nga walay kompromisong mobarog ug molihok subay sa hustisya, kamatuuran, ug kaligdong, ug molingkawas sa bangi sa mga nagharing-hut-ong ug mga pamilyang nakapahimulos sa burukrata-kapitalismo.

“Ang isyu sa korapsyon sa flood control projects usa ka gamayng bahin lamang sa malukpanon ug sistematikong korapsyon sa reaksyunaryong gubyerno,” matud ni Ka Lila. Dili lamang kini mahitungod sa bangi sa pipila kundili mahitungod sa burukrata-kapitalismo o pagpahimulos nga gakahitabo sa pagpadagan sa gubyerno isip negosyo, ang paghakop sa bahandi sa mga anaa sa gahum.”

“Ginapapha sa CNL ang naratibo nga sa duha ka nanagbanging kampo lamang angayng matunga ang pagdapig, tungod parehong angayang manubag silang Marcos Jr ug Sara Duterte duyog sa uban pang mga nalambigit,” matud ni Ka Mingol.

Bisan lahi-lahi ang ginasulti sa mga lider-simbahan kalabot sa korapsyon, matud ni Ka Lila, tin-aw sa CNL ang malukpanong kasuko dinhi sa masang relihiyoso.

“Hagit sa mga lider sa simbahan nga mahimong sumbanan sa pagkamapahiubsanon ug dayalogo,” dugang ni Ka Mingol. Nanawagan usab siya sa mga nahaubos nga lider—mga obispo, pari, pastor, ministro, ug mga lokal nga lider—nga dili lang magsunudsunod sa upisyal nga linya, ilabina kung lapas kini sa mga nasabtan nila mahitungod sa hustisya. “Tigprotekta sila sa panon, dili tigpanalipud sa gahum o kahilum atubangan sa dautan. Kinahanglan nilang umulon ang konsyensya sa kaligdong aron makiglambigit nga adunat baruganan di lang isip myembro sa bloke kundili isip mga responsableng indibidwal sa katilingban.”

Sama sa nangagi, daku kaayo ang papel sa Simbahan sa pag-organisa ug pagpukaw sa katawhan alang sa hustisya ug katilingbanong kausaban, matud ni Ka Mingol. Mahinungdanon nga walay-hunong nga pakusgon ang han-ay alang sa demokratikong rebolusyon sa katawhan. Matud niya, determinado ang CNL nga mapatigbabawan ug malabngan ang grabeng hagit sa konserbatismo, self-preservation ug Red-tagging aron kab-oton ang bag-ong kalagsik sa pagpalapad sa han-ay sa mga rebolusyonaryo sa mga tawong relihiyoso.

Gipasabot sa CNL nga aron mabatukan ang burukrata-kapitalismo, kinahanglan og rebolusyonaryong paglihok. Usa kini sa nakapapukaw ug nakapahugpong, ilabina sa lapad nga han-ay sa relihiyosong kabatan-onan. Makita kanila kadasig sa pagsalmot sa mga lihok-protesta hangtud sa armadong pakigbisog sa kabanikanhan. Ginakampanya sa CNL sa mga tawong-simbahan ang rebolusyonaryong programa sa National Democratic Front: ginapakita nga adunay alternatibong sistema sa panggamhanan nga nagaalagad sa demokratikong interes sa masa.