Nagdeklara og upat ka adlaw nga hunong-buto ang Partido Komunista ng Pilipinas (PKP) isip pakighiusa sa mga tradisyunal nga pagsaulog sa masang Pilipino. Gimandoan sa Komite Sentral sa Partido ang Bagong Hukbong Bayan (BHB) nga ipatuman kini gikan 00:00 sa buntag sa Disyembre 25 hangtud 23:59 sa gabii sa Disyembre 26 ug gikan 00:00 sa buntag sa Disyembre 31, 2025 hangtud 23:59 sa gabii sa Enero 1, 2026.

Matud sa liderato sa Partido, paghatag-dalan ang hunong-buto sa mga simpleng pagsaulog sa mga Pilipino atubangan sa grabeng katilingbanon ug ekonomikanhong kahimtang ilalum sa rehimeng Marcos. Higayon usab kini sa rebolusyonaryong kalihukan, duyog ang katawhan, aron saulugon ang ika-57 nga anibersaryo sa Partido sa Disyembre 26.

Sa pagpatuman sa hunong-buto, gimandoan sa Komite Sentral ang mga yunit sa BHB nga mag-aktibong depensa ilabina atubangan sa kadaut sa walay puas nga mga operasyong kombat sa Armed Forces of the Philippines (AFP). Kinahanglang hugot nga makigtinabangay ang mga yunit ng BHB sa masa aron mapatuman kini. “Kinahanglan usab nga kanunay silang andam nga magmaniobra o maglunsad og kontra-atake sa panahong gikinahanglan sa kahimtang,” matud sa Komite Sentral.

Diha-dihang gikontra sa AFP ug Department of National Defense ang unilateral nga hunong-buto sa Partido ug hukbong bayan. Matud sa Partido, ang maong pamahayag sa mga ginsakpan sa rehimeng Marcos nagpamatuud sa uhaw-sa-dugong kinaiya sa iyang armadong pwersa ug planong tugawon ang malinawong mga pagsaulog sa masang Pilipino.

“Walay laing gustong iregalo si Marcos sa katawhan sa umalabot nga mga tradisyunal nga pagsaulog kundili bala ug bomba sa pagmando niini sa AFP ug mga pulis nga maglunsad og walay puas nga mga operasyong kombat sa kabanikanhan,” matud ni Marco Valbuena, nangulong upisyal sa impormasyon sa Partido.

Samtang, gimakmak sa Partido ang gipakaylap sa Philippine Army nga paglapas sa BHB sa hunong-buto sa panagsangka nga nahitabo sa Northern Samar niadtong Disyembre 15, bisan og di pa kini langkub sa deklarasyon.