Labaw nga migrabe niining lumalabayng tuig 2025 ang krisis sa ekonomiya ug pulitika sa nagharing sistema, labawng migrabe ang interbensyong militar sa imperyalismong US ug misamot ang katilingbanong kahimtang sa mayorya sa katawhan. Dungan niini, mikusog ang mga pakigbisog batok sa korapsyon ug pasismo sa rehimeng US-Marcos.

Nahimong tataw ang bangi sa mga nagharing hut-ong, partikular ang lantugiay sa magkaaway nga paksyong Marcos ug Duterte. Gipasaka sa kongreso niadtong Pebrero ang kasong impeachment batok kang Sara Duterte, apan nahunong ang kaso dihang gipugngan mismo ni Ferdinand Marcos Jr ang pagdungog sa Senado. Niadtong Marso, nakigtinabangay si Marcos sa Interpol sa pag-aresto ug pagpriso sa The Netherlands sa kanhing presidenteng si Rodrigo Duterte pinaagi sa mandamyento sa International Criminal Court. Didto siya taralun sa mga krimen batok sa katawhan tungod sa dinaghang pagpatay sa “war on drugs.”

Nahitabo niadtong Mayo ang eleksyon sa senado, kongreso ug lokal nga gubyerno. Tataw ang pagpanglimbong ug manipulasyon sa resulta. Nagsalamin kini sa panagbangi ug akomodasyon sa lain-laing paksyon sa nagharing hut-ong, ug interbensyon sa imperyalismong US. Samtang nagpabiling hingpit ang suporta sa US kang Marcos, gipwesto na usab niini ang iyang mga reserbang kabayo sa pagdagan sa eleksyong 2028.

Walay susama ang interbensyong militar sa US sa tibuok tuig. Sa pakigkunsaba sa rehimeng Marcos ug gamit ang Armed Forces of the Philippines (AFP), giablihan ang bag-ong mga base ug pasilidad militar. Naghan-ok ang US og dugang nga mga armas sa Pilipinas. Walay hunong nga ginapahigayon ang mahagitong mga ehersisyong militar sulod ug palibot sa South China Sea, sa kaalautan sa mga mangingisdang Pilipino.

Labaw nga mikusog ang lantugiay sa mga nagharing hut-ong human mabutyag ang dakung kaso sa korapsyon kalabot sa puno sa kahiwian nga mga flood control project ug kontrata sa mga proyektong pang-imprastruktura. Miulbo ang kasuko sa katawhan sa daku kaayong kwarta nga ginabulsa ni Marcos ug sa mga korap nga upisyal sa gubyerno.

Misulbong sa tibuok nasud ang lapad nga kalihukang protesta batok sa korapsyon ug burukrata-kapitalismo. Sulod sa duha ka bulan sukad Setyembre, nagpadayon ang mga walkout ug rali sa mga estudyante sa lain-laing kampus. Natukod ang lapad nga alyansa sa mga pwersang anti-korapsyon sa lain-laing sektor ug lugar, bisan og adunay pipila ka pwersa nga tinuyong ginasimang ang kasuko sa katawhan kang Marcos.

Taliwala sa pagsulay nga tabunan ang papel sa Malacañang sa mga anomalya pinaagi sa gipasundayag nga “imbestigasyon,” gibutyag sa mga nalambigit sa korapsyon nga mismong si Marcos ang utok ug nagadawat og daku kaayong kikbak sa gatusan ka bilyong pisong mga proyektong pang-imprastruktura. Sa wala madugay, milanog ang singgit para sa pagpaluwat o pagpalagpot kang Marcos ug Duterte.

Ang protesta batok sa korapsyon miulbo taliwala sa padayon nga paglalum sa krisis sa ekonomiya, pagkahagba sa kahimtang sa lapad nga masa sa katawhan, ug walag too nga mga programa ug lakang sa rehimeng Marcos nga paantus sa katawhan.

Lapad ang disgusto sa katawhan atubangan sa ubos nga suhulan sa mga mamumuo, kawalay trabaho, halos sinimana nga pagsaka sa presyo sa lana, mahal nga singil sa palpak nga mga serbisyo sa tubig, kuryente ug transportasyon, jeepney phaseout, pribatisasyon sa mga merkado, magun-ubon sa kinaiyahan ug panginabuhian nga reklamasyon, pagpangilog og yuta, pagpalayas sa mga mag-uuma ug uban pang pagpaantus. Mini ang ginaingong kalinaw taliwala sa grabeng pagpanumpo ug pagpaantus sa katawhan.

Malukpanon ang panawagan alang sa ₱1,200 inadlawng minimum na suhulan. Nahimong tataw ang pipila ka welga sa mga mamumuo ug protesta sa lain-laing sektor sa lain-laing lugar aron ipakigbisog ang ilang kaayuhan. Nagkalapad ug nagkadaghan ang mibarog batok sa pasistang pagpanumpo sa rehimeng Marcos. Daghan ang napukaw sa pagpresentar sa mga progresibong partido sa nasudnon-demokratikong programa sa pagsalmot sa eleksyon. Ang determenasyon sa pag-organisa ug pagpalihok sa masa siguradong motigum ug mobwelo sa umalabot nga mga panahon.

Atubangan sa lalum nga krisis ug subsub nga pakigbisog, ug bunga sa kalihukang pagtul-id, padayon nga nakapakusog ang Partido ug mga rebolusyonaryong pwersa. Padayon nga gipataas ang ang-ang sa teorya ug praktika pinaagi sa kalihukang pagtuon. Gipakaylap sa Partido ang pagtuon sa burukrata-kapitalismo isip giya sa pagsabot sa katawhan sa isyu sa korapsyon.

Gipakusog ang mga tago nga rebolusyonaryong organisasyong masa sa mga mamumuo, mag-uuma, kabatan-onan, magtutudlo, artista, siyentista, mga duktor, nars ug mamumuong pangkalusugan, tawong-simbahan, mga migranteng Pilipino, ug iba pang mga sektor sa kasyudaran. Samtang nagpropaganda alang sa demokratikong rebolusyon sa katawhan, nagkadaghan ang nagdesisyon nga mosalmot sa armadong pakigbisog ug rebolusyonaryong kalihukang mag-uuma sa kabanikanhan.

Sa kabanikanhan, padayon nga nagaabante ang mga pakigbisog sa mag-uuma sa pagpanalipud sa ilang yuta ug panginabuhian batok sa mga mangingilog, batok sa paantus nga mga palisiya sa rehimeng Marcos ug pasistang pagpanumpo sa mga armadong gaway niini. Nahitabo ang mga barikada ug laing porma sa protesta sa pipila ka lugar. Ginapakusog ang mga sanga ug komite sa Partido, ginatukod ang mga rebolusyonaryong organisasyong masa sa mga mag-uuma, kabatan-onan ug kababayen-an, ang ilang mga yunit milisya ug yunit depensa-sa-kaugalingon, samtang nanglimbasog ang mga yunit sa Bagong Hukbong Bayan sa gimbuhatong masa ug gerilyang pakiggubat.

Sa pagpangulo ug pag-abag sa Partido, padayon ang BHB sa pagpalapad ug pagpalalum sa baseng masang mag-uuma. Sa naangkon niining lapad nga suporta, mayorya sa mga yunit sa BHB nakapreserba og kusog sa pag-atubang sa walay puas nga mga operasyong kombat sa AFP. Nagkadaghan ang mga kadaugan sa aktibong pagdepensa, taktikal nga opensiba ug pagsilot sa mga lunod-patay nga traydor ug pasista. Padayon ang pagrekrut ug pagbansay sa mga bag-ong Pulang manggugubat ug kumander.

Atubangan sa malahutayong krisis sa nagharing sistema, ug sa pundasyon ng kalihukang pagtul-id, nakalantaw ang Partido sa dugang pagpakusog ug pag-abante sa demokratikong rebolusyon sa katawhan sa umalabot nga mga tuig. Determinado ang Partido nga pangulohan ang lapad nga masa sa pag-asdang sa malungtarong gubat sa katawhan ug pagkab-ot og mga kadaugan sa tibuok nasud.