Aregluhanay sang tungaay sang pork barrel sa badyet 2026 ang nalahad sa pumuluyo sa ginpatigayon nga bicameral conference committee (bicam) sang Senado kag Manubo nga Kapulungan. Bisan pa naka-livestream, indi matago sang mga Tighimo sang Layi ang ila pagsantikanay sa kon ano-ano nga porma sang pork barrel kag pila ang mabilin nga badyet. Ginpinal sang bicam ang puno sang pork barrel nga badyet sadtong Disyembre 18.

Kuno ginbuhinan sang Senado ang badyet sang Department of Public Works and Highways sang ₱45 bilyon tungod sa overpricing pero ginbalik man sa bicam ang masobra katunga sang pondo. Gani, nagapabilin sa badyet ang kadam-an sang pondo nga “allocable” kag “non-allocable” kon diin nagakuha ang presidente, mga kongresista kag senador sang ila matag-kikbak.

Isa pa ka gin-areglo ang pagdugang sang pondo para sa Medical Assistance for Indigent and Financially Incapacitated Patients, pork barrel sang mga kongresista sa dagway sang “serbisyo pang-ikaayong-lawas.” Ginpasakaan pa sang bicam ang alokasyon halin sa orihinal nga ₱49.2 bilyon padulong sa ₱51.64 bilyon, pondo nga dapat tani dugang sa badyet sang mga pangpubliko nga ospital.

Gin-areglo man sa bicam ang “LGU pork” ukon Local Government Support Fund nga halos gindoble sang Senado halin sa ₱20.2 bilyon padulong sa ₱38.1 bilyon. Ginbuhinan sang Senado ang pondo para sa mga benepisyo kag bonus sang mga empleyado para pahabukon ang pondo nga ayuda nga gina-uyatan sang mga lokal nga opisyal.

Ang mga alokasyon nga ini dugang sa nauna nga nakasugtan nga pondo nga ginauyatan sang mga kongresista sa dagway sang ayuda. Ginpasakaan sang bicam ang ayuda nga Assistance to Individuals in Crisis Situations halin sa orihinal nga ₱27 bilyon padulong sa ₱63 bilyon.

Napabilin man ang pork barrel ni Marcos na ₱243.4 bilyon para sa unprogrammed appropriation (nga bantog nga ginagamit sa maanomaliya nga flood control project) kag ₱10.77 bilyon nga confidential and intelligence fund. Bilog man ang ₱8-bilyon nga pork barrel sang pasistang ahensyang NTF-Elcac.