Innareglo ti panagbibingay ti pork barrel iti badyet 2026 ti naiparang iti umili iti naiyaramid a bicameral conference committee (bicam) ti Senado ken Konggreso. Uray pay naka-livestream, saan nga inlemmeng dagiti mammanday-linteg ti panagririkyar da iti anya la dita a porma ti pork barrel ken mano ti mabati iti badyet. Inpinal ti bicam ti badyet a natatek ti pork barrel idi Disyembre 18.

Kampay idi ket kinissayan ti Senado ti badyet ti Department of Public Works and Highways iti ₱45 bilyon gapu iti overpricing ngem naisubli met laeng iti bicam ti nasurok kagudwa ti pondo. Iti kasta, nagtalinaed iti badyet ti kaadwan ti pondo nga “allocable” ken “non-allocable” nu sadinno a mangal-ala ti presidente, dagiti konggresista ken senador ti kikbak da.

Maysa pay a naareglo iti bicam ti panagnayon ti pondo para iti Medical Assistance for Indigent and Financially Incapacitated Patients, pork barrel dagiti konggresista iti langa ti “serbisyo a pangsalun-at.” Inngato pay ti bicam ti alokasyon manipud iti orihinal a ₱49.2 bilyon agturong ti ₱51.64 bilyon, pondo a rumbeng koma a nainayon iti badyet dagiti pangpubliko nga ospital.

Maar-areglo met iti bicam ti “LGU pork” wenno Local Government Support Fund a dandani dinoble ti Senado manipud iti ₱20.2 bilyon agturong ₱38.1 bilyon. Kinissayan ti Senado ti pondo para kadagiti benepisyo ken bonus dagiti empleyado tapno padakkelen ti pondo nga ayuda nga iggem dagiti lokal na upisyal.

Dagitoy nga alokasyon ket nayon iti immunan a napagnunumuan a pondo nga iggem dagiti mammanday-linteg iti langa ti ayuda. Inngato pay ti bicam ti ayuda nga Assistance to Individuals in Crisis Situations manipud iti orihinal a ₱27 bilyon agturong ti ₱63 bilyon.

Napagtalinaed met ti pork barrel ni Marcos a ₱243.4 bilyon para iti unprogrammed appropriation (a nalatak a naaramat iti naanomalya a flood control project) ken ₱10.77 bilyon a confidential and intelligence fund. Sibubukel met ti ₱8-bilyon a pork barrel ti pasista nga ahensya nga NTF-Elcac.