Lima ka armadong aksyon ang gilunsad sa mga yunit sa Bagong Hukbong Bayan (BHB) sa isla sa Negros ug Samar sa milabayng mga semana. Lakip dinhi ang pagtarget sa mga aset paniktik sa militar ug nag-operasyong mga pulis.

Sa Negros Occidental, napatay si Police Senior Master Sergeant Rommel Aguilar dihang nakipinusilay ang mga pulis sa usa ka tim sa BHB-Northern Negros (Roselyn Jean Pelle Command). Nakumpiska kaniya ang usa ka 9mm pistola ug mga bala. Nasugatan sa BHB ang grupo sa mga pulis sa Purok 5, Barangay Lagaan sa Calatrava niadtong Disyembre 7. Paatras niadtong tungura ang mga Pulang manggugubat gikan sa aksyong militar batok kang Mando Ugdiman, usa ka aset paniktik sa militar, sa Sityo Tagda, Barangay Dolis. Nasakmit kang Ugdiman ang usa ka .45 pistola, mga bala ug uban pang himang iggugubat.

Niadtong Disyembre 13, patay ang aset paniktik nga si Amay Jimenez sa Sityo Makilo, Barangay Camansi, Kabankalan City sa operasyon sa BHB-Southwest Negros (Armando Sumayang Jr Command). Nalambigit si Jimenez sa pagtudlo sa lokasyon ug pagplano sa pagpatay niadtong Nobyembre 2022 sa igsuon niyang lider mag-uuma nga si Joseph Jimenez ug konsultant pangkalinaw sa National Democratic Front of the Philippines nga si Ericson Acosta. Usa pa ka aset paniktik ang gisilutan sa Sipalay City niadtong Disyembre 4.

Makahibulong nga depensa

Sa Samar, duha ka sundalo sa Intelligence Service of the AFP (ISAFP) ug Military Intelligence Batallion (MIB) ilalum sa 8th ID ang napatay sa armadong engkwentro sa BHB-Western Samar (Arnulfo Ortiz Command) sa Barangay Babaclayon, San Jose de Buan. Nahitabo ang panagsangka niadtong Disyembre 3 sa ala-1:32 sa kaadlawon.

Matud sa taho sa BHB, duha ka manggugubat niini ang anaa sa komunidad aron konsultahon ang masang gigun-ob sa militarisasyon sa mga sundalo. Dili moubos sa 20 ka tropang militar ang tulo-ka-adlaw nang nag-operasyon sa maong komunidad niadtong adlawa.

Giliyukan sa mga operatibang paniktik sa militar ang balay nga ilang gisak-an ug pugos silang ginapasurender. Apan gisiguro sa mga Pulang manggugubat ang kaluwasan sa mga sibilyan, ug luwas nga gipagawas sa balay ang tibuok pamilya. Gipabuthan sa usa ka Pulang manggugubat ang mga sundalo nga mipugwat kanila. Sa atubangan mismo sa mga kaaway mihapa ang Pulang manggugubat samtang nagpabuto sa iyang dalang pistola. Duha ka pasistang tropa ang napatay sa dinul-itay nga panagsangka. Aron makalayo, miambak ang duha ka Pulang manggugubat pagawas sa balay samtang gipabuthan sa kaaway. Nasamdan ang usa sa mga manggugubat.