CBA sa Wyeth-Nestle ug unyon. Pormal nga napinal sa Wyeth Philippines Progressive Workers Union ang CBA niini sa Wyeth-Nestle Philippines niadtong Disyembre 9. Malampusong naduso sa unyon ang dugang-suhulan nga ₱6,000 sa mosunod nga tulo ka tuig. Nakab-ot usab sa unyon ang ₱30,000 signing bonus ug mga benepisyong ilang giduso pinaagi hiniusang paglihok.

Protesta sa mga mamumuo sa Gardenia ug Philfoods. Nagprotesta ang mga mamumuo ug unyon sa Gardenia Bakeries Phils Inc ug Philfoods Fresh Baked Products Inc sa pabrika ug sa gawas sa Laguna International Industrial Park (LIIP) sa Biñan, Laguna niadtong Disyembre 19. Nanawagan sila sa dugang-suhulan, benepisyo, ug paghunong sa pag-atake sa mga myembro sa unyon.

Mga marinong gideport sa US, gisingil ang DFA ug mga manning agency. Human makasinati og arbitraryong deportasyon sa US, giduso sa mga marinong Pilipino ang ilang katungod, ug gisingil ang DFA ug mga manning agency. Sa dayalogo niadtong Disyembre 12, nagsaad ang upisyal sa DFA nga paspasan ang pagproseso sa bag-ong pasaporte sa apektadong mga marino, ayuda aron moapela sa pagkansela sa visa ug tangtangon ang singil dinhi.

Pagtahod sa mga katungod sa pamuo, giduso sa Wipro Cebu. Nagpahigayon og silent protest ang mga empleyado sa Wipro Philippines sa Cebu dungan sa pakigdayalogo sa ilang mga representante sa kumpanya ug DOLE niadtong Disyembre 1. Gireklamo sa mga empleyado ang patung-patong nga mga paglapas sa kumpanya sa ilang katungod sa pamuo. Nag-unang reklamo nila ang dili makatarunganong plano sa Wipro Cebu nga gipailalum ang 400 ka empleyado sa “floating status” gikan niadtong Disyembre 15.

Mga Pilipinong mamumuo sa Taiwan, mibotar pabor sa welga. Mibotar niadtong Disyembre 1 pabor sa welga ang kababayen-ang mamumuong Pilipino sa Taidoc Technology Co. Ltd. batok sa paglapas sa kumpanya sa mga balaod sa pamuo. Lakip dinhi ang pugos nga pagpalimpyo sa pabrika, hugot nga palisiya sa dormitoryo, ug dili makatarunganong mga balayrunon. Kini ang kinaunhang welga sa unyon.