Gindumdom sang lain-lain nga tsapter sang Migrante ang pangkalibutanon nga adlaw sang mga migranteng mamumugon sadtong Disyembre 18. Gindeklarar man nila ini bilang “Zero Remittance Day batuk sa korapsyon,” isa ka adlaw nga dululungan nga indi magpadala sang kwarta ang mga migrante sa Pilipinas. Porma ini sang protesta sang mga migranteng mamumugon agud irehistro ang ila pagkundenar sa lapnagon nga korapsyon kag pagpasabat sa tanan nga imbolbado.

Nagpakigbahin sa kampanya ang mga tsapter sang Migrante sa Thailand, Hong Kong, Japan, Canada, France, Italy, Australia, South Korea, Germany, Middle East kag USA.

Naglunsar man sang protesta ang pila ka tsapter sang Migrante agud kundenaron ang mga pagpang-abuso kag diskriminasyon nga ginaagum nila bilang migranteng mamumugon.

Sa New Zealand, ginpanawagan sang Migrante-Aotearoa ang pagtapos sa sistema sang pagkahigot sang work visa sang migrante sa employer.

Sa US, nagprotesta ang Tanggol Migrante Movement (TMM) sa konsolado sang Pilipinas sa Chicago, California kag Washington agud ipanawagan ang paghilway sa mga Pilipinong imigrante nga gindetenir sang Immigration and Customs Enforcement (ICE). Gin-anunsyo man ang pagtukod sang Families of Filipinos in Detention, organisasyon sang mga himata, abyan kag mga sadto nadetiner sang ICE.

Sa Pilipinas, nagprotesta sa Mendiola ang mga myembro sang Migrante Philippines halin sa tsapter sini sa lain-lain nga probinsya. Nagpakigbahin sa protesta ang Concerned Seafarers of the Philippines, Samahan ng mga DH sa Gitnang Silangan, kag Kilusang Mayo Uno.