Ginhandum han magkalain-lain nga tsapter han Migrante an pankalibutan nga adlaw han mga migrante nga trabahador hadton Disyembre 18. Gindeklara liwat nira ini komo “Zero Remittance Day kontra ha korapsyon,” usa nga adlaw nga duruyog nga diri magpapadara hin kwarta an mga migrante ha Pilipinas. Porma ini han protesta han mga migrante nga trabahador agud igrehistro an ira pagkundenar ha hiluagan nga korapsyon ngan pagpapabaton ha ngatanan nga dabi.

Pinartisipar ha kampanya an mga tsapter han Migrante ha Thailand, Hong Kong, Japan, Canada, France, Italy, Australia, South Korea, Germany, Middle East ngan USA.

Naglansar liwat han protesta an pira nga tsapter han Migrante agud kundenaron an mga pangabuso ngan diskriminasyon nga nahiaaguman nira komo migrante nga trabahador.

Ha New Zealand, ginpanawagan han Migrante-Aotearoa an pagtapos ha sistema han paghihigot han work visa han migrante ha employer.

Ha US, nagprotesta an Tanggol Migrante Movement (TMM) ha konsulado han Pilipinas ha Chicago, California ngan Washington agud igpanawagan an pagpapalaya ha mga Pilipino nga imigrante nga gindetiner han Immigration and Customs Enforcement (ICE). Gin-anunsyo liwat an pagtukod han Families of Filipinos in Detention, organisasyon han mga kaurupdan, sangkay ngan han mga hadto anay gindetiner han ICE.

Ha Pilipinas, nagprotesta ha Mendiola an mga membro han Migrante Philippines tikang ha mga tsapter hini ha magkalain-lain nga prubinsya. Pinartisipar ha protesta an Concerned Seafarers of the Philippines, Samahan ng mga DH sa Gitnang Silangan, ngan Kilusang Mayo Uno.