Linagip ti nadumaduma a balangay ti Migrante ti sangalubongan nga aldaw dagiti migrante a mangmangged idi Disyembre 18. Indeklara da met daytoy bilang “Zero Remittance Day laban iti korapsyon,” maysa nga aldaw nga aggigiddan a saan nga agipaw-it ti kwarta dagiti migrante iti Pilipinas. Porma daytoy ti protesta dagiti migrante a mangmangged tapno irehistro ti panangkundenar da iti nasaknap a korapsyon ken panagpasungbat iti amin a karaman.

Nakipaset iti kampanya dagiti balangay ti Migrante iti Thailand, Hong Kong, Japan, Canada, France, Italy, Australia, South Korea, Germany, Middle East ken USA.

Nagisayangkat met ti protesta ti sumagmamano a balangay ti Migrante tapno kundenaren dagiti panagabuso ken diskriminasyon a mapadpadasan da kas migrante a mangmangged.

Idiay New Zealand, inyawag ti Migrante-Aotearoa ti panaggibus ti sistema ti panangigalut ti work visa ti migrante iti employer.

Idiay US, nagprotesta ti Tanggol Migrante Movement (TMM) iti konsulado iti Pilipinas idiay Chicago, California ken Washington tapno iyawag ti panangruk-at kadagiti Pilipino nga imigrante nga inbalud ti Immigration and Customs Enforcement (ICE). Naiyanunsyo met ti panangbuangay ti Families of Filipinos in Detention, organisasyon dagiti kapamilya, gagayyem ken dagiti dati a balud ti ICE.

Iti Pilipinas, nagprotesta idiay Mendiola dagiti kameng ti Migrante Philippines manipud kadagiti balangay daytoy iti nadumaduma a prubinsya. Karaman iti protesta ti Concerned Seafarers of the Philippines, Samahan ng mga DH sa Gitnang Silangan ken Kilusang Mayo Uno.