Sa tunga sang maid-id nga operasyon militar, nagapanikasog ang rebolusyonaryong kahublagan sa Negros sa pagsulong sa kahublagan panadlong. Tayuyon ini nga nagatinguha nga konsolidahon ang Bagong Hukbong Bayan (BHB) kag ang Partido. Nagahiwat ini sang kolektibo nga mga pagtuon sang lebel-lebel nga kurso sang Partido kag mga paghanas militar.

Sang sini lang, ginhiwat sa isla ang intermedyang kurso sang Partido sa “staggered” ukon parte-parte nga pamaagi. Gintambungan ini sang mga kadre kag opisyal militar. Luwas nga natapos ang bug-os nga kurso nga naglawig sang kabug-osan nga 54 ka oras. Unod sang pagtuon ang dugang nga mga prinsipyong ubay sa pagpapagsik sang hilikuton masa kag pagpatuman sang mga rebolusyonaryong hilikuton sa balayon sang kahublagan panadlong.

Madinalag-on man ang pagtapos sang mga kadre kag opisyal sang BHB sa pagtuon kag paghanas sa ginpalip-ot nga kurso sa hilikuton paniktik. Tatlo kag tunga sa adlaw, lakip na ang praktikum, ang gindugay sang paghanas. Ang resulta sang praktikum nadesisyunan sang kumand nga himuon nga opisyal nga mga plano sa mga igalunsar nga taktikal nga opensiba sang BHB.

“Dugang ini nga ihibalo teoritikal nga pagtuon kag paghanas sa madinalag-on nga hilikuton militar ilabi na ang paglunsar sang taktikal nga opensiba,” suno kay Ka Marco, lider sang platun.

“Dapat nga mahatagan sang hustisya ang mga biktima nga mga kaupod kag masa halin sa grabe nga pasismo sang kaaway…kinahanglan nga makakumpiskar sang bala kag armas halin sa berdugo kag pasistang AFP, PNP kag paramilitar kag ipaarmas sa mga bag-ong rekrut nga Pulang hangaway” suno sa iya.

“Tuman ka luto subong ang kahimtangan pangpulitika. Dapat sabton sang Partido ang iya papel sa pagpamuno kag himuon sang Hukbo ang sentral nga katungdanan sini paagi sa madinalag-on nga taktikal nga opensiba kadungan sa masingki nga kaakig sang pumuluyong Pilipino tuhoy sa pagpangkawkaw sang estado sa kaban sang banwa,” suno kay Ka Myra, instruktor sa pulitika.

“Dapat mabaskog nga pabagtingon ang lingganay sang rebolusyonaryong kahublagan sa lapnagon nga opensiba kag nagalanog nga lupok sang mga armas sang Bagong Hukbong Bayan sa kaumhan kadungan sa lapnagon nga protesta sang masa sa mga kadalanan sa kasyudaran,” suno sa iya.