Ha butnga han sik-on nga operasyon militar, nagpupursige an rebolusyunaryo nga kagiusan ha Negros ha pagpapasulong han kagiusan pagtutul-id. Dirudiretso ini nga nagtatalinguha nga konsolidahon an Bagong Hukbong Bayan (BHB) ngan an Partido. Naglansar ini han mga kolektibo nga mga pag-aram ngan barubalitang nga kurso han Partido ngan mga pagpapahiara-militar.

Diri pala maiha, nahilansar ha isla an intermedya nga kurso han Partido ha “staggered” o paruparte nga pamaagi. Gintambungan ini han mga kadre ngan upisyal militar. Talwas nga nahuman an bug-os nga kurso nga nag-iha han kabug-usan nga 54 kaoras. Unod han pag-aram an dugang nga mga prinsipyo nga giya ha pagpaparayhak han buruhaton masa ngan pagpapatuman han mga rebolusyunaryo nga buruhaton ha balayan han kagiusan pagtutul-id.

Madinaugon liwat an paghuhuman han mga kadre ngan upisyal han BHB ha pag-aram ngan pagpahiara ha ginpahalipot nga kurso ha buruhaton paniktik. Tulo ngan tunga hin adlaw, lakip na an praktikum, an kaihaon han pagpahiara. An resulta han praktikum napagdesisyunan han kumand nga himuon nga upisyal na mga plano ha mga iglalansar nga taktikal nga opensiba han BHB.

“Dugang nga kahibaruan an teoretikal nga pag-aram ngan ini nga pagpapahiara ha madinaugon nga buruhaton militar labina an paglansar han taktikal nga opensiba,” sigon kan Ka Marco, lider han platun.

“Kinahanglan matagan hustisya an mga biktima ngan mga kasama ngan masa tikang ha grabe nga pasismo han kaaway… kinahanglan makagkumpiska han bala ngan armas tikang ha berdugo ngan pasista nga AFP, PNP ngan paramilitar ngan ig-armas ha mga bag-o nga rekrut nga Pula nga mangaraway” sering niya.

“Hinog kaupay yana an pampulitika nga kamutangan. Kinahanglan batunon han Partido an iya papel ha pamumuno ngan himuon han Hukbo an sentral nga responsibilidad hini pinaagi han madinaugon nga taktikal nga opensiba kadungan han mga grabe nga kangalas han katawhan Pilipino hiunong ha pangungurakot han estado ha kwarta han katawhan,” sigon kan Ka Myra, pampulitika nga instruktor.

“Kinahanglan makusog nga pabagtingon an lingganay han rebolusyunaryo nga kagiusan ha hiluagan nga opensiba ngan mag-aningal an bubto han mga armas han Bagong Hukbong Bayan ha kabaryuhan kadungan han hiluagan nga protesta han masa ha mga kakalsadahan ha kasyudaran,” sering niya.