Iti tengnga ti nasedsed nga operasyon militar, agpingpinget ti rebolusyonaryo a tignay idiay Negros iti panangiyabante iti tignay panagilinteg. Tuluy-tuloy daytoy nga agpingpinget a konsolidaen ti New People’s Army ken ti Partido. Agisaysayangkat daytoy kadagiti kolektibo a panagadal ti tukad-tukad a kurso ti Partido ken dagiti panagsanay-militar.

Itay nabiit, naangay iti isla ti intermedya a kurso ti Partido iti “staggered” wenno paset-paset a pamuspusan. Dinar-ayan daytoy dagiti kadre ken upisyal militar. Natalged a naileppas ti sibubukel a kurso a bimmayag iti 54 oras. Linaon ti panagadal dagiti nayon a prinsipyo a tarabay iti panangparegta ti gawaing masa ken panangipatungpal kadagiti rebolusyonaryo a trabaho iti balangkas ti tignay panagilinteg.

Naballigi met ti panagleppas dagiti kadre ken upisyal ti NPA iti panagadal ken panagsanay iti pinaababa a kurso iti trabaho a paniktik. Tallo ket gudwa nga aldaw karaman ti praktikum ti kabayag ti panagsanay. Ti resulta ti praktikum ket napagdesisyunan ti kumand nga aramiden nga upisyal a plano kadagiti isayangkat a taktikal nga opensiba ti NPA.

“Nayon a kaamwan daytoy a teoretikal a panagadal ken panagsanay iti naballigi a trabaho a militar nangruna ti panagiruswat ti taktikal nga opensiba,” segun ken Ka Marco, lider ti platun.

“Rumbeng a maikkan hustisya dagiti biktima a kakadwa ken masa manipud iti nakaro a pasismo ti kabusor…kasapulan a makasamsam ti bala ken armas nga agtaud iti berdugo ken pasista nga AFP, PNP ken paramilitar ken ipaarmas kadagiti baro a rekrut a Nalabbaga a mannakigubat,” kunana.

“Naluom la unay tatta ti kasasaad iti pulitika. Kasapulan nga akemen ti Partido ti papel na iti panangidaulo ken aramiden ti Hukbo ti sentral a rebbengen daytoy babaen kadagiti naballigi a taktikal nga opensiba kagiddan ti nakaro a pungtot ti umili a Pilipino seknan ti panagtakaw ti estado iti kaban ti umili,” segun ken Ka Myra, instruktor iti pulitika.

“Nasken a napigsa a batingtingen ti kampana ti rebolusyonaryo a tignay iti nasaknap nga opensiba ken naaweng a putok dagiti armas ti New People’s Army iti kaaw-awayan kagiddan ti nasaknap a protesta ti masa kadagiti kalsada iti kasyudadan,” kunana.