Lima nga armado nga aksyon ti insayangkat dagiti yunit ti New People’s army (NPA) iti isla ti Negros ken Samar kadagiti napalabas a lawas. Kabilang kadagitoy ti panagtarget kadagiti aset paniktik ti militar ken dagiti agop-operasyon a pulis.

Idiay Negros Occidental, napatay ni Police Senior Master Sergeant Rommel Aguilar idi nakipinnutok dagiti pulis iti maysa a tim ti NPA-Northern Negros (Roselyn Jean Pelle Command). Nasamsam kenkwana ti maysa a 9mm pistola ken balbala. Nasabat ti NPA ti grupo dagiti pulis iti Purok 5, Barangay Lagaan idiay Calatrava idi Disyembre 7. Paatras idi dagiti Nalabbaga a mannakigubat manipud iti aksyon militar laban ken Mando Ugdiman, maysa nga aset paniktik ti militar, idiay Sityo Tagda, Barangay Dolis. Nasamsam ken Ugdiman ti maysa a .45 pistola, balbala ken dadduma pay nga usar panggubat.

Idi Disyembre 13, natay ti aset paniktik a ni Amay Jimenez idiay Sityo Makilo, Barangay Camansi, Kabankalan City iti operasyon ti NPA-Southwest Negros (Armando Sumayang Jr Command). Ni Jimenez ket sangkot iti panangitudo iti lokasyon ken panagplano iti panangpatay iti kabsat na a lider mannalon a ni Joseph Jimenez ken iti konsultant pangkapya ti National Democratic Front of the Philippines a ni Ericson Acosta idi Nobyembre 2022. Maysa pay nga aset paniktik ti nadusa idiay Sipalay City idi Disyembre 4.

Nalaing a depensa

Idiay Samar, dua a soldado ti Intelligence Service of the AFP (ISAFP) ken Military Intelligence Batallion (MIB) iti sidong ti 8th ID ti napatay iti armado nga engkwentro iti NPA-Western Samar (Arnulfo Ortiz Command) iti Barangay Babaclayon, San Jose de Buan. Napasamak ti labanan alas-1:32 ti parbangon idi Disyembre 3.

Segun iti ulat ti NPA, dua a mannakigubat daytoy ti adda iti komunidad tapno konsultaen ti masa a dangdangran ti militarisasyon dagiti soldado. Saan a bumaba iti 20 tropa a militar ti tallo aldawen nga agop-operasyon iti nasao a komunidad didiay nga aldaw.

Ti balay a nagdagusanda ket pinalikmutan dagiti operatiba a paniktik ti militar ken paspasukuen da isuda. Iti sango daytoy, sinigurado dagiti Nalabbaga a mannakigubat ti kinatalged dagiti sibilyan, ken pinarwar da iti balay ti pamilya. Pinaputokan ti maysa a Nalabbaga a mannakigubat dagiti soldado a nakakigtotan da. Iti mismo a sango dagiti kabusor ket nagpakleb ti Nalabbaga a mannakigubat bayat nga agpappaputok ti awit na a pistola. Dua a pasista a tropa ti napatay iti sangon-sango a labanan. Tapno makaadayo, limmagto ti dua a Nalabbaga a mannakigubat paruar ti balay bayat a pappaputokan ti kabusor.